Arysta 748 úıge jóndeý jumystary júrgizilýde

NUR-SULTAN. QazAqparat - Arystyń búgingi jaı-kúıi týraly naqty aqparat berý maqsatynda Arys qalasynyń ákimi Murat Qadyrbek, QR Qorǵanys mınıstrliginiń ókili Ermııan Bıatov, Túrkistan oblystyq densaýlyq saqtaý basqarmasynyń basshysy M. Egizbaev jýrnalısterdiń qatysýymen brıfıng ótkizdi, dep habarlaıdy Túrkistan oblysy ákimdiginiń baspasóz qyzmeti.

«QR Qarýly Kúshteriniń áskerı qyzmetshileri Arys qalasyna tıesili aýmaqty tolyq qaıta tekserý jumystaryn júrgizýde. Nátıjesinde 28 myńnan asa oq-dári tabyldy. Qala mańyndaǵy Aqdala, Dermene aýyldaryn tazartý aıaqtaldy. Sondaı-aq Arys aýmaǵyna jáne oǵan tıesili jerlerde radıatsııalyq, bıologııalyq jaǵdaıǵa monıtorıng jasaldy. Qalada radıatsııalyq fon birqalypty. Jarylys bolǵan áskerı bólimshe komandıri qazirgi ýaqytta qyzmet ornynda. Oǵan qatysty tergeý jumystary júrgizilýde», dep málimdedi polkovnık E. Bıatov.

Arys qalasynyń ákimi M. Qydyrbek «Apattan zardap shekken qala qazirgi tańda 17 sektorǵa bólinip, ár oblys jumysyn bastaǵany belgili. Qazirgi tańda 170 brıgada qurylysqa kiristi. Jóndeý jumystary bir aıdyń ishinde aıaqtalady. 748 úıge jóndeý jumystary júrgizilip jatyr», dedi.

Oblystyq densaýlyq saqtaý basqarmasynyń basshysy M.Egizbaev qazirgi tańda Arystaǵy emhana naýqastardy qabyldap jatqanyn jáne 1 aı ishinde qalalyq aýrýhana iske qosylatynyn atap ótti.