Arysta 66 áleýmettik nysanda jóndeý jumystary aıaqtalýǵa jaqyn

NUR-SULTAN. QazAqparat - Arys qalasynda 6704 úıdiń jóndeý jumystary aıaqtaldy. Bul aýqymdy qurylysqa 184 kompanııa, 7382 qurylysshy jáne 298 mamandandyrylǵan tehnıka jumyldyrylǵan, dep habarlaıdy Túrkistan oblysy ákiminiń baspasóz qyzmeti.

Bul týraly Túrkistan oblysy ákimi Ómirzaq Shókeevtiń qatysýymen Arys qalasynda ótken apparattyq jıynda málim boldy.

Májiliste baıandama jasaǵan QR Indýstrııa jáne ınfraqurylymdyq damý birinshi vıtse-mınıstri Qaıyrbek Óskenbaev, menshik ıeleriniń kelispeý sebepteri boıynsha 75 jeke turǵyn úıde qurylys júrgizý úshin kelisimder jasalyp jatqanyn jetkizdi.

«Arys qalasynda barlyǵy 66 áleýmettik nysan bar. Onyń ishinde 53 bilim berý mekemesi, 8-densaýlyq saqtaý, 4-sport, 1-dańq alleıasy. Barlyq obektiler zaqymdanǵan, sonyń ishinde «Samuryq-Qazyna» AQ qarajaty esebinen 62 nysan kúrdeli jóndeýge jáne 4 obekt tolyq qalpyna keltirýge jatady. 4 bala baqshada jumystar aıaqtaldy. Qalǵan 62 nysanda jumys júrgizilip jatyr», – dedi vıtse-mınıstr Q.Óskenbaev.

Aıta keteıik Arys qalasyndaǵy shaǵyn jáne orta bıznestiń zaqymdanǵan barlyq nysandary «Atameken» ulttyq kásipkerler palatasy arqyly iri bıznes qarajaty esebinen qalpyna keltiriledi. Búgingi kúni 64 kásipkerlik sýbektisine 251,5 mln. teńge ótemaqy tólengen.