Arysta 60 shaqyrym jol tolyǵymen qaıta jóndeledi

ARYS. QazAqparat - Arys qalasynda 272,3 shaqyrymdy quraıtyn kóshege analız jasalyp, nátıjesinde 67 kósheniń jolyna zaqym kelgeni anyqtaldy. bul týraly Túrkistan oblysy ákimdiginiń baspasóz qyzmetinen málim etti, dep habarlaıdy QazAqparat.

«17 sektordyń 13-inde tótenshe jaǵdaılar saldarynan qala ishindegi 67 kósheniń jamylǵysyna zaqym kelgeni anyqtaldy. Kóshelerdegi aqaýlardy joıý jáne olardy zaman talabyna sáıkes keltirý úshin jalpy uzyndyǵy 60 shaqyrymǵa jýyq 67 kóshede kelesideı jumystar atqarylatyn bolady: 46,7 shaqyrym trotýar tóseledi; 68,6 shaqyrym jolǵa 2 234 dana jaryq shamdary ornatylady; 7 shaqyrym velosıped joly salynady; 41 tekshe metr sýaǵar; jalpy aýmaǵy 9 522 sharshy metr kósheniń jıekteri jóndeledi», - delingen ákimdik málimetinde.

Jóndeý jumystaryn júrgizý josparlanǵan 67 kósheniń 40 kóshesinde búgingi tańda jumystar júrgizilýde. Oǵan 60-qa jýyq arnaıy tehnıka men 110-nan astam jumysshy tartylǵan.

«Arys qalasynyń kóshelerin qalpyna keltirý boıynsha aǵymdaǵy jyldyń 3 tamyzy kúngi jaǵdaı boıynsha kelesideı jumystar atqarylýda: 4 kóshede asfalt salý jumystary aıaqtaldy; 19 kóshede joldyń negizine qumdy-shaǵal tas tóseý jumystary júrgizilýde; 15 kóshede aıaqjol salý jumystary júrýde; 2 kóshede jaryqtandyrý baǵanalaryn ornatatyn uńǵymalar qazylyp, beton quıý jumystary júrgizilip jatyr. Jalpy jóndeý jumystaryn aǵymdaǵy jyldyń tamyz aıynda tolyq aıaqtaý josparlanǵan», - dedi Túrkistan oblysy ákiminiń baspasóz qyzmetinen.