Arysta 1870 úıdiń jóndeý jumysy aıaqtaldy
Baspasóz málimetterine qaraǵanda, Túrkistan oblysynyń ákimi Ómirzaq Shókeev tótenshe jaǵdaıdyń zardaptaryn joıý, qurylys qarqynyn báseńdetpeý, turǵyndarǵa jan-jaqty jaǵdaı jasaý máselelerin qozǵap, qurylysty keshiktirip jatqan sektor basshylaryna jumysty kúsheıtý kerektigin aıtty.
QR Indýstrııa jáne ınfraqurylymdyq damý birinshi vıtse-mınıstri Qaıyrbek Óskenbaevtyń aıtýynsha, jalpy Arys qalasynda jeke úılerdiń 7 myńnan astamy, kópqabatty úılerdiń 100-ge jýyǵy zaqymdalyp, osy nysandarda jumystar júrgizilip jatyr.
Búginde 17 sektor boıynsha 7445 úıge aqaý aktisi jasalyp, 4827 úıde qurylys jumystary qolǵa alynǵan. Zertteýler nátıjesinde jaramsyz úıler sany 293-ke jetti. Onyń ishinde 4-eýi – kópqabatty úıler. Bul úıler tolyq basynan salynady. Birqatarynyń irgetasy qalanyp ta úlgergen. Qurylys jumystaryna elimizdiń túkpir-túkpirinen 215 kompanııa jáne 7 myńnan astam adam tartylǵan.
Qaladaǵy 66 áleýmettik nysan boıynsha da jóndeý jumystary atqarylyp jatyr. Onyń ishinde 4-eýi basynan salynady. Bul jumystarǵa 1788 jumysshy, 29 kompanııa jumyldyrylǵan.
Jıynda tıisti sala basshylary apta saıyn jármeńke uıymdastyrylyp jatqanyn, 200-den astam arystyq ardager demalysqa jiberilgenin málimdedi. Sonymen birge 2 myńnan astam bala da elimizdiń demalys lagerlerinde tynyǵyp júr. Qoımalarǵa jınalǵan 789,2 tonna azyq-túliktiń 689,5 tonnasy turǵyndarǵa taratylǵan. Búginde 1545 az qamtamasyz etilgen jáne kópbalaly otbasylarǵa kómek kórsetilýde. Densaýlyǵy nashar 31 turǵynǵa qolarba berilgen.
Oblystyq shtab múshesi, ishki saıasat basqarmasynyń basshysy B.Tájibaev sektorlarda turǵyndardyń aryz-shaǵymy boıynsha jumys atqarylyp jatqanyn, árbir shaǵym der kezinde tirkeletinin málimdedi. Turǵyndar arasynan ár 10 úıge bekitilgen belsendiler de jumysqa tartylyp, sektorlarda turǵyndarmen kezdesý turaqty júrip jatqanyn jetkizdi.
Al oblystyq qarjy jáne memlekettik aktıvter basqarmasynyń basshysy A.Tasybaev 100 myń teńge ótemaqyǵa 61 myńǵa jýyq qujat tapsyrylǵanyn, 49393 turǵynnyń mekenjaıy QR Іshki ister mınıstrliginiń bazasymen rastalǵanyn málimdedi. Qujattar boıynsha jumys jalǵasyp jatyr.
Jıynda Arys qalasyna qatysty ózekti máseleler talqylanyp, qurylysy nashar júrip jatqan sektor basshylaryna syn-eskertpeler aıtyldy. Qalanyń sý, elektr jáne jylý júıeleriniń jumysyn shıratý, jol salý máseleleri de sóz boldy. Óńir basshysy Ó.Shókeev oblystyq shtab árbir sektorǵa jaýapty oblys pen aýdan ákimdikterimen birlesip, turǵyndardyń aryz-shaǵymy boıynsha júıeli ári muqııat jumys atqarýy tıis ekenin aıtty. Árbir máselege ýaqtyly ári der kezinde toqtalyp, qurylys qarqynyn báseńdetpeýdi tapsyrdy.
