Arysqa jaqyn aýyl turǵyndary da ótemaqy alatyn boldy
Arys qalasyndaǵy tótenshe jaǵdaıǵa baılanysty QR Premer-Mınıstri Asqar Mamın arystyqtarǵa 100 myń teńge kóleminde bir rettik ótemaqy berý jóninde tapsyrma bergeni belgili.
«Bul - QR Prezıdenti Qasym-Jomart Toqaevtyń baqylaýynda turǵan másele. Osy tapsyrmaǵa sáıkes Arys qalasynyń 44 994, Aqdala aýyl okrýginiń 4 324, Qojatoǵaı aýyl okrýginiń 4 232 jáne Dermene aýyl okrýginiń 2 052 turǵynyna 100 myń teńgeden ótemaqy beriletin boldy. Bul qarajattardyń 3 mlrd teńgesi Qazaqstan Respýblıkasy Úkimetiniń rezervi esebinen, 1 mlrd teńgesi oblystyq bıýdjetten jáne arnaıy qurylǵan «Túrkistan» áleýmettik qoryna túsken qarjydan 1,6 mlrd teńge bólinedi dep kútilýde», - delingen ákimdik habarlamasynda.
Jergilikti turǵyndardan qujattardy qysqa merzimde jınaýǵa Arys qalasyndaǵy 17 sektorda bekitilgen tıisti mamandar jáne aýdan, qala ákimdikteriniń qyzmetkerleri jumyldyrylǵan. Olar aǵymdaǵy jyldyń 3-shi shildesinen bastap ótemaqy alýǵa ótinishter jınaqtaýda. Búgingi kúnge 58 207 turǵynnan qujattar jınaqtalyp, bul jalpy tirkelgen turǵynnyń 104,7 paıyzyn qurady. Atalǵan baǵytta tıisti jumystar jalǵasyp, bekitilgen mamandar kelmegen turǵyndar boıynsha mekenjaılaryna baryp habarlaýda.
Tótenshe jaǵdaıdan zardap shekken arystyqtarǵa baǵyttalǵan bul tólemaqy eki-úsh apta kóleminde tólenedi dep josparlanyp otyr.
