Arys jáne Baızaq aýdanyndaǵy jarylys saldaryn joıý jumysy qaıta jandanady
Qarýly kúshterdiń ınjenerlik-saperlik bólimsheleri bıylǵy jyldyń 28 naýryzynan bastap Arystaǵy jáne Jambyl oblysynyń Baızaq aýdanyndaǵy oq-dári qoımalarynda oryn alǵan oqıǵalardyń saldaryn joıý jumystaryna kirisedi.
Atalǵan sharalar «Qaýipsiz el» ulttyq jobasyn jáne Memleket basshysy Qasym-Jomart Toqaevtyń oq-dárilerdi qaýipsiz saqtaýdy qamtamasyz etý jónindegi tapsyrmalaryn iske asyrý sheńberinde júrgiziledi.
Arys qalasynda jarý jolymen joıylatyn oq-dári qaldyqtary qoımalardyń tehnıkalyq aýmaǵynan arnaıy jabdyqtalǵan polıgonǵa jetkiziledi.
Jambyl oblysyndaǵy ınjenerlik oq-dári qoımasynyń aýmaǵynda oq-dári qaldyqtaryn joıýǵa arnalǵan oryn jabdyqtalǵan. Al qalǵan bóligi arnaıy polıgondarǵa shyǵarylyp, joıylady.
Jalpy osy jumystarǵa 650-den astam áskerı maman tartylady. Jergilikti halyqtyń qaýipsizdigin qamtamasyz etýge erekshe nazar aýdarylyp otyr.
Arystaǵy jáne Jambyl oblysynyń Baızaq aýdanyndaǵy oq-dári qoımalarynda oryn alǵan oqıǵalardyń saldaryn joıý jumystary bıylǵy qarasha aıynyń sońyna deıin jalǵasady.
