«Arys jaǵasynda» retro-festıvalinde elimizge belgili bes sazgerdiń ánderi shyrqaldy
ASTANA. QazAqparat - Ońtústik Qazaqstan oblysynda «Arys jaǵasynda» retro-festıvali ótti. Óńirde segizinshi ret ótkizilip otyrǵan merekelik keshte elimizge belgili Turdyqylysh Іztaı, Muhtar Quralov, Quralaı Sátmuhanbetova, Lesbek Amanov, Erjan Serikbaev syndy kompozıtorlardyń ánderi oryndaldy, dep habarlaıdy OQO ákimdiginiń baspasóz qyzmeti.
Merekelik sharaǵa qatysqan oblys ákimi J.Túımebaev barsha óner súıer qaýymyn quttyqtap, búgingi sharanyń mańyzdylyǵyna toqtaldy.
«Qazaq halqy - ejelden óner súıgen, ónerpazdaryn qadirlegen halyq. Al óner - bizdiń rýhymyz. Rýh eshqashan da ólmeıdi. Eń qasıetti rýh halyqta dep bilemin. Sol sebepti de rýhanııat halyqpen birge máńgi jasaıdy. Bul festıval búginde tek ońtústik jurtyna ǵana emes, búkil elge aty máshhúr. Ońtústik óńirden shyǵyp, barsha qazaqtyń maqtanyshyna aınalǵan kompozıtorlardy, óner ujymdary men ánshilerdi dáripteýge, olardyń shyǵarmashylyǵyn nasıhattaýǵa baǵyttalǵan bul shara ulttyq ónerdi, jergilikti daryndardy qoldaýdyń alańyna aınaldy», - dedi ákim.
Jyr keshinde jergilikti sazgerlerdiń halyq arasynda keńinen taraǵan 20 áni oryndaldy. Festıvalge elimizge tanymal óner juldyzdary QR Eńbek sińirgen qaıratkeri Ulyqpan Joldasov, QR Mədenıet qaıratkerleri Jubanysh Jeksenuly, Shahızada Baıpatshanova, Aqbota Kerimbekovalar qatysty.
Festıval tarıhy 1992 jyldan bastaý alǵan. Osy jyldan bastap oblysta Shámshi Qaldaıaqov atyndaǵy «Meniń Qazaqstanym» án baıqaýy ótkizilip keledi. Atalǵan baıqaý ótken jyly Shámshi aǵanyń týǵan jeri Otyrar aýdanynda ótkizilse, bıyl Sozaq aýdanynda ótti. Baıqaýdyń aıasynda Ońtústik Qazaqstan oblysynan shyqqan kompozıtorlardyń shyǵarmashylyǵyn nasıhattaý, olarǵa qoldaý kórsetý maqsatynda 2010 jyldan bastap «Arys jaǵasynda» retro - festıvali Sh.Qaldaıaqovtyń atyna berilgen osy gúlzarda jyl saıyn ótkizilip keledi.
Osymen segizinshi ret uıymdastyrylǵan retro-festıval bıyl da joǵarǵy deńgeıde ótti.
