«Arys jaǵasynda» retro-festıvali tuńǵysh ret Túrkistanda ótedi
TÚRKІSTAN. QazAqparat - Toǵyzynshy ret ótip jatqan «Arys jaǵasynda» retro-festıvali bıyl oblys ortalyǵy Túrkistan qalasynda ótedi. Bul týraly QazAqparat oblys ákiminiń baspasóz qyzmetine silteme jasap habarlaıdy.
Aıtýly shara byltyrǵy jyly tek bes kompozıtordyń ǵana shyǵarmashylyǵyn nasıhattaýǵa arnalsa, bıylǵy festıvalde birneshe sazgerdiń shyǵarmalary oryndalatyn bolady.
Túrkistan oblysyna ǵana tán festıvaldiń maqsaty - barsha qazaqtyń maqtanyshyna aınalǵan jergilikti kompozıtorlardy, óner ujymdary men ánshilerdi dáripteý, olardyń shyǵarmashylyǵyn nasıhattaý.
Bıylǵy jyr keshine QR Mádenıet qaıratkerleri ánshi-sazger Marat Omarov, Jubanysh Jeksenuly, Hadısha Shalabaeva, Qazaqstannyń eńbek sińirgen qaıratkeri, ánshi Aıgúl Imanbaeva, ánshi-sazger Zattybek Kópbosynuly, Asqar Jaılaýbaev, «Astana», «Qarǵabaı», «Arbat», «Saryn» toptary óner kórsetpek. Ónerpazdar jergilikti sazgerlerdiń halyq arasynda keńinen taraǵan ánderin oryndaıdy.
«Arys jaǵasynda» retro - festıvali 2010 jyldan bastap Shymkent qalasyndaǵy Sh.Qaldaıaqovtyń atyna berilgen gúlzarda jyl saıyn ótkizilip kelse, bıyl tuńǵysh ret oblys ortalyǵy - Túrkistan qalasynda uıymdastyrylyp otyr.
