«Arys-Túrkistan» arnasyna memleket qaıratkeri N. Ońdasynovtyń aty berilse eken - Q. Aıtahanov
ASTANA. 4 qarasha. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda senator Qýanysh Aıtahanov Úkimet basshysynyń atyna depýtattyq saýal joldady. Onda senator memleket qaıratkeri Nurtas Ońdasynovtyń estelik kitaptaryn shyǵarý jáne onyń esimin «Arys-Túrkistan» arnasyna berý týraly másele kóterdi.
«Buǵan deıin de Qazaqstannyń memleket bolyp qalyptasýyna bar kúsh-jigeri men bilim-parasatyn aıamaı, el ekonomıkasy men mádenıetiniń, ónepi men ǵylymynyń órkendeýine ólsheýsiz úles qosqan, respýblıka Úkimetin qıyn kezeńde 15 jylǵa jýyq basqarǵan Nurtas Dándibaıuly Ońdasynovtyń eńbekterin kitap etip shyǵarý týraly másele kótergen edi. Ol boıynsha Úkimetten atalmysh eńbekterdiń qoljazbasy ázirlense, 2010 jyly bıýdjettik baǵdarlama aıasynda shyǵarylatyn kitaptar tizimine qosylatyny týraly jaýap alǵanmyn. Alaıda, búgingi tańda Mádenıet jáne aqparat mınıstrliginiń keıbir fýnktsııalary Baılanys jáne aqparat mınıstrligine berilýine baılanysty atalǵan ýáde oryndalmaı qaldy», -dedi senator.
Onyń aıtýynsha, búgingi tańda, N. Ońdasynovtyń 5 tomdyq kitaptary ázirlengen. Atap aıtqanda, «Arabsha-qazaqsha túsindirme sózdik» - 2 tom, «Parsysha-qazaqsha túsindirme sózdik» - 1 tom, «Shyǵys halyqtarynyń maqal-mátelderi» - 1 tom, «Arab tekti qazaq esimderi» jáne ózi týraly jazyp qaldyrǵan esteligi, ár jyldarda jazǵan maqala-áńgimeleri basyp shyǵarýdy qajet etedi. «Elimizdiń kórnekti qoǵam jáne memleket qaıratkeri, Nurtas Ońdasynovtyń esimin el jadynda qaldyrý maqsatynda, onyń jaryq kórmegen eńbekteri 2011 jyly kitap bolyp shyǵarylsa ıgi. Sonymen qatar, N. Ońdasynov esimin Ońtústik Qazaqstan oblysyndaǵy «Arys-Túrkistan» arnasyna berý máselesi oń sheshimin tapsa eken», dedi senator.
