Arys turǵyndarynyń 99 paıyzy ótemaqyǵa qujat tapsyrdy

ARYS. QazAqparat - Búgin Arys qalasyn qalpyna keltirý jumystary boıynsha oblys ákimi Ómirzaq Shókeevtiń tóraǵalyǵymen jıyn ótti. Bul týraly QazAqparat ákimdiktiń baspasóz qyzmetine silteme jasap habarlaıdy.

Májiliste QR Indýstrııa jáne ınfraqurylymdyq damý mınıstrliginiń birinshi vıtse-mınıstri Qaıyrbek Óskenbaevtyń aıtýynsha, barlyq sektorda qurylys qarqyndy júrip jatyr. Arasynda jospardan keshikkenderine, jumys kúshi jetpeı jatqan oblystarǵa tıisti eskertýler berilip, jumys tolyq baqylaýǵa alynǵan.

Osy derekterge toqtalǵan vıtse-mınıstr qurylys aýmaǵyna merdigerler men jumysshylardy kóbeıtý kerektigin de atap ótti.

Qala jáne qala mańynan 20 shaqyrym aýmaqta áskerıler tekserý, tazalaý jumystaryn jalǵastyrýda. Arnaıy tikushaqpen de monıtorıng jasap júrgen áskerıler oq-dári tazalanǵanyn, jarylys qaýpi joq ekenine kóz jetkizgen. Bul týraly QR Qorǵanys mınıstriligiń ókili Rýslan Shpekbaev málimdedi. 42 toptan quralǵan saperlar kúsheıtilgen rejımde jumys isteýde. Turǵyndardyń shaqyrtýlaryna da jedel jetetin kezekshiler uıymdastyrylǵan.

Túrkistan oblystyq polıtsııa departamenti bastyǵynyń orynbasary Ábdiǵanı Seıdýalıevtiń aıtýynsha, qala qaýipsizdigi men tynyshtyǵyn 300-den astam polıtseı kúzetýde. 17 sektordyń bárinde tártip saqshylary kezekshilik jasaýda.

Túrkistan oblystyq qurylys basqarmasy basshysynyń orynbasary Erbol Ahmetov qalada qurylys jáne jóndeý jumystary bastalyp ketkenin málimdedi. Al oblystyq qarjy basqarmasynyń basshysy Arman Tasybaev 100 myń teńge ótemaqyǵa qujat tapsyrǵandar sany 99 paıyzdan asqanyn jetkizdi. Taıaýda 100 paıyzǵa jetedi. Sebebi bul baǵytta jumys oıdaǵydaı júrip jatyr. Qujattar tekserilgen soń tamyz aıynyń basynda turǵyndarǵa ótemaqy berile bastaıdy.

Túrkistan oblystyq emhanasynyń bas dárigeri Marat Pashımov jarylys saldarynan zardap shekken 65 naýqas jazylyp, aýrýhanadan shyqqanyn aıtsa, oblys ákiminiń keńesshisi Ulasbek Sádibekov barlyq sektorlarda turǵyndardyń talap-tilegi tyńdalyp, 800-ge jýyq jergilikti belsendi, el aǵalary men úkimettik emes uıym músheleri gýmanıtarlyq jáne ózge de kómekterdi uıymdastyrý sharalaryna tartylǵanyn málimdedi. Turǵyndar úshin jármeńkeler da jalǵasyn tappaq.

Árbir jaýapty basshyny jeke-jeke tyńdaǵan oblys ákimi Ómirzaq Shókeev jumysqa asqan jaýapkershilikpen qaraý kerektigin eskertti. Qalany tıimdi basqarý jáne turǵyndarǵa qolaıly jaǵdaı jasaý úshin 17 sektordy bolashaqta da qaldyrý kerektigin aıtty.

Sonymen birge qurylysty kesheýildetip jatqan sektorlarda jumysty shıratýdy tapsyrdy.