Arys turǵyndary 4 baǵytta evakýatsııalanýda
"Arys qalasynyń turǵyndaryn evakýatsııalaý tórt baǵytta júrgizilip jatyr: Shymkent qalasy, Montaıtas eldi mekeni (30 shaqyrym), Qabylsaı eldi mekeni (25 shaqyrym) jáne Shaǵyr eldi mekeni (35 shaqyrym). Shymkent qalasynda 15 evakýatsııalyq beket qurylyp, olarǵa 170 adam jetkizilip, ornalastyryldy. Montaıtas eldi mekeninde 904 adam tirkelgen, evakýatsııalanǵan halyqty tirkeý (halyq tirkeý úshin 3 jedel top qurylyp, jiberildi) jalǵasyp jatyr", - dedi ol.
Onyń dereginshe, halyqty evakýatsııalaý jumystaryna Túrkistan oblystyq, Shymkent qalalyq tótenshe jaǵdaılar qyzmeti, polıtsııa departamentteri men jergilikti atqarýshy organdardyń kúshteri men quraldary jumyldyrylǵan. Evakýatsııalanǵan halyqqa aýyz sý jetkizilip jatyr. Arys qalasy turǵyndaryn qulaqtandyrý úshin 2 habarlandyrý júıesi iske qosylǵan.
Arysta polıtsııa qyzmetkerleri qoǵamdyq tártipti qorǵaý jáne evakýatsııalanǵan halyqtyń dúnıe-múlkin qorǵaýǵa jumyldyrylǵan. Sonymen qatar quqyq qorǵaý organdarynyń qyzmetkerleri oqıǵa oryn alǵan jerdi oqshaýlaý jumystaryn júrgizip, halyqty Arys qalasynan shyǵarý sharalaryna da qolǵabys tıigizip jatyr. Munan bólek, Arystaǵy qoǵamdyq tártipti qorǵaýǵa Shymkent qalasyndaǵy QR ІІM Ulttyq gvardııasy áskerı bóliminiń 500 jaýyngeri jiberilgen. Tótenshe oqıǵa oryn alǵan jerge ІІM men jergilikti atqarýshy organdardyń shamamen 1000 mamany men 160 tehnıkasy shoǵyrlandyrylǵan. Taraz qalasynyń TJK "Qazavıaqutqarý" AQ-nyń Evrokopter EC-145 tikushaǵy da qajet kezde kómek kórsetýge daıyn tur.
"Azamattyq qorǵanys kúshteriniń is-qımyldaryn úılestirý úshin oqıǵa ornynda QR ІІM TJK tóraǵasy, general maıor V.Bekker, "Ońtústik" óńirlik qolbasshylyǵy qolbasshysynyń birinshi orynbasary-shtab bastyǵy A.Qaskelenov, QR ІІM Tergeý departamenti bastyǵynyń orynbasary polkovnık K.Nurmaǵambetov júr", - dedi N.Nurahmetov.
Resmı ókil dereginshe, respýblıka boıynsha arnaıy qurylǵan qaýyrt jelige halyqtan 878 qońyraý, onyń ishinde TJK shtaby qaýyrt jelisine 28 qońyraý túsip, olar der ýaqytynda Shymkent qalasyndaǵy TJD shtabyna berilgen.
"Arys qalasynda oryn alǵan oqıǵa baılanysty Túrkistan oblysynda qaýyrt jeli jumys istep tur: Shymkent qalalyq TJ departamentinde 8(7252)44-94-72, 35-33-66, Túrkistan oblystyq TJ departamentinde: 8(7253)35-83-02, ІІM Tótenshe jaǵdaılar komıtetinde 8(7172)53-32-84, 53-32-79. Atalǵan nómirler arqyly ózińizge qajetti aqparattardy táýlik boıy ala alasyzdar", - dedi ol.
