Arys pen Saryaǵashtan Mańǵystaýǵa shóp tıelgen vagondar legi jóneltildi

AQTAÝ. QazAqparat - 17 shildede Saryaǵash jáne Arys stansalarynda Mańǵystaý oblysyna 33 vagon nyǵyzdalǵan shóp jiberilgen, dep habarlaıdy QazAqparat.

Onyń ishinde 15 vagondy «Qazaqstan temir joly» ulttyq kompanııasy berip otyr.

«Mal azyǵyn jiberý QTJ seriktesteri «Shyńǵar Trans» JShS, «PrommashKZ» JShS, «Integra Construction KZ» JShS, «Bastaý Trans» JShS, «Aqtóbe relsaryqalyq zaýyty» JShS-nyń qarjylaı qoldaýymen júzege asty. Oǵan qosa taǵy 7 vagon júk tıeýge daıyn tur. Olardy jóneltý jeksenbige josparlanǵan», delingen habarlamada.

Kompanııanyń málimetinshe, qosymsha vagondarǵa ótinish áli de kóbeıýi múmkin. Kólikpen qamtamasyz etý men júkti jóneltý máselesin ótinish sanyna qaraı birtindep sheshimek. Sondaı-aq, vagondardyń stansalarda turǵany úshin eshqanda aqy alynbaıdy.

Shymkenttik Qurmet Talapqazy Mańǵystaýdaǵy qýańshylyqqa baılanysty jem-shóp ázirleýdi bastama etip kótergen bolatyn. Eriktiler Mańǵystaýǵa kómektiń alǵashqy legin jetkizip berdi.

Bastama jalǵasyn taýyp, maqtaaraldyqtar - 1 vagon, Jetisaı aýdanynyń turǵyndary - 74 tonna press shóp jóneltken bolatyn. Batystyq aǵaıynǵa kómek kórsetýdi shardaralyqtar men Qazyǵurt aýdanynyń turǵyndary jalǵady.