«Arys» pen «Maqtaaral» komandalary joldastyq kezdesý ótkizdi
Fýtbol dodasyna Maqtaaral aýdanynyń ákimi Baqyt Asanov arnaıy qatysyp, qos komandaǵa sáttilik tiledi.
«Búgin Maqtaaral aýdany men Arys qalasynyń quramalary joldastyq kezdesý ótkizýde. Mundaǵy maqsat - tótenshe jaǵdaıdan zardap shekken arystyq aǵaıyndardy bir sátke bolsa da buqaralyq sportqa tartyp, salaýatty ómir saltyn ustanýǵa shaqyrý bolyp tabylady. Oblys ákiminiń bastamasymen Arys qalasyndaǵy jarylystan zardap shekken úılerdi qalpyna keltirý úshin qala sektorlarǵa bólindi. Shyǵys Qazaqstan oblysy men Maqtaaral aýdanyna 8-shi sektor bekitilip, búgingi tańda úılerdi qalpyna keltirý jumystary aıaqtalyp otyr. Bul - biz úshin úlken qýanysh, úlken toı. Sondyqtan, búgingi fýtboldan ótip jatqan joldastyq kezdesý osy bir qýanyshymyzǵa arnalady. Endeshe, qos komandaǵa sáttilik tileımin!» - dedi Baqyt Asanov.
Tartysty ótken oıynnyń 17-shi mınýtynda «Maqtaaral» komandasynyń shabýylshysy, Premer-lıga oıyndarynyń alǵashqy golynyń avtory Abylaıhan Mahambetov esepti ashty. Al, oıynnyń 20-shy mınýtynda «Arys» komandasynyń ardager oıynshysy Qaırat Rysbaev tarazy basyn teńestirdi. Qaýipti shabýyldar jasaǵan arystyq komanda oıynnyń 23-shi mınýtynda qonaqtardyń qaqpasyna ekinshi goldy salyp, alǵa shyqty. Ekinshi goldyń avtory 17-shi nómirli oıynshy – Maksım Kozorenko boldy.
Oıynnyń ekinshi taımynyń toǵyzynshy mınýtynda arystyq komandanyń oıynshysy Ábilhaıyr Abylaı maqtaaraldyqtardyq qaqpasyna gol soǵyp, esepti eseledi. Tolassyz shabýyldardyń arqasynda «Maqtaaral» fýtbol klýbynyń surmergeni A.Mahambetov ekinshi goldy qaqpaǵa joldasa, dál sol oıynshy oıynnyń aıaqtalýyna tórt mınýt qalǵanda alań ıeleriniń qaqpasyna úshinshi goldy salyp, kezdesý 3:3 esebimen teń aıaqtaldy.
