Arys oqıǵasy: Almaty oblysynan gýmanıtarlyq 10 júk kóligi attandy
TALDYQORǴAN. QazAqparat - Búgin Almaty oblysynan Arys turǵyndaryna 60 mln teńgeniń gýmanıtarlyq kómegi jóneltildi. 10 júk kóligine qurylys zattary, azyq-túlik pen kıim-keshekter tıelgen, dep habarlaıdy QazAqparat tilshisi.
«15 tonna un, 7 tonna qant, 2 tonna kúrish, 10 myń qaptama sýsyn, 25 qorap aıaq kıim, 5 myń danadan astam birrettik jaıalyq jáne taǵy basqa qajetti zattar jóneltildi»,- delingen Almaty oblystyq «Nur Otan» partııasynyń baspasóz qyzmeti taratqan aqparatta.
Barlyǵy 60 mln teńgege gýmanıtarlyq kómek attandyrylǵan.
Sondaı-aq Almaty oblysynyń memlekettik qyzmetshileri 1 kúndik jalaqylaryn Arystaǵy aǵaıynǵa aýdarady. Ol qarjy shamamen 24 mln teńgeni quraıdy.
Almaty oblysy ákimdigi baspasóz qyzmetiniń jetekshisi Ǵalymurat Júkeldiń aıtýynsha, arystyqtarǵa jóneltilip otyrǵan gýmanıtarlyq kómekke Almaty oblysynyń barsha turǵyndary úles qosqan. Halyq qarjylaı, zattaı qoldaý bildirip, Arystaǵy aǵaıynmen birge ekendikterin jumyla kórsetti.
Sonymen qatar, Almaty oblysynyń ákimdigi Arystyń 150 balasyn jazǵy lagerge qabyldaýǵa daıyn.
