Arys qalasynyń oqýshylary Qarqaralyda demalyp jatyr
Baspasóz málimetterine qaraǵanda, Saryarqanyń injý-marjany sanalatyn demalys aýmaǵyna saıahatty olar úshin Qaraǵandy memlekettik tehnıkalyq ýnıversıteti uıymdastyrdy. JOO sapar boıynsha barlyq shyǵyndardy óz moınyna alyp, «Polıtehnık» demalys bazasyn usynyp, jas týrıster úshin tanymdyq-oıyn-saýyq baǵdarlamasyn uıymdastyrdy.
«Ázirge Arys qalasynda oq-dári qoımasyndaǵy jarylystan keıin úıler qalpyna keltirilýde, biz balalardyń demalýyna jáne «Polıtehnık» demalys bazasynda saýyǵýlaryna múmkindik jasaý qajet degen sheshimge keldik. Ol Qarqaraly ulttyq tabıǵı parkiniń kórkem jerinde ornalasqan. Balalar lagerge 25 shildede kelip, 15 kúndi osynda ótkizedi. Olardyń bos ýaqytyn tálimgerler, anımatorlar men ekskýrsııa ótkizýshiler uıymdastyrady», - dedi QarMTÝ apparatynyń jetekshisi Gúlnaz Mýsına.
Baǵdarlama keń aýqymdy. Kýratorlyq qyzmetti «Jas Orda» jastar
uıymynyń belsendileri men ýnıversıtettiń jastar saıasaty departamentiniń
ókilderi óz moınyna alǵan. Sheberlik-synyptar men trenıngter bilim men qabilettiń
deńgeıin arttyrýǵa múmkindik beredi. Balalar týrıstik serýenderge barady,
baıqaýlar men oıyndarda, zııatkerlik jáne sporttyq jarystarda bir-birimen
básekelesedi. Ekskýrsııa kezinde olar tabıǵı saıabaqtyń qyzyqty jerlerin, tarıhy
baı Qarqaraly kóne qalasynyń kórikti jerlerin tamashalaıdy.
