Arys qalasynyń 56 úıinde qalpyna keltirý jumystary júrgizildi

NUR-SULTAN. QazAqparat - Indýstrııa jáne ınfraqurylymdyq damý mınıstrliginiń málimetinshe, 2019 jyly 5 shildede Túrkistan oblysy Arys qalasynda 236 úıde qalpyna keltirý jumystary júrgizildi. Qazir jumystar 2000-nan astam qurylysshy eńbek etetin 500-den astam nysandarda júrgizilýde, dep habarlady QR IIDM baspasóz qyzmeti.

Qalany qalpyna keltirý boıynsha aýqymdy is-sharaǵa respýblıkalyq mańyzy bar 17 óńir men qala qatysady. Qıraýdyń negizgi bóligi áskerı polıgonǵa jaqyn mańdaǵy aýmaqqa keldi, ony 5 shartty sektorǵa bólip, Atyraý, Túrkistan, Qaraǵandy, Pavlodar jáne Jambyl oblystarynyń ákimdikterine bekitip berdi.

Túrkistan oblysy jetekshilik etetin № 7 sektorda jóndeý jumystary 111 nysanda júrgizilýde. Barlyǵy 20 kompanııa, 200 qurylysshy jáne 50 arnaıy tehnıka jumyldyryldy.

«Birinshi kezekte biz kúrdeli jóndeý qajet bolǵan jerge baramyz. Biz osyndaı aýdandar men úılerdi basymdyqqa qoıyp otyrmyz. Úsh kún ishinde 10 úıdi tolyq tapsyrýdy josparlap otyrmyz», - dedi Túrkistan oblystyq qurylys basqarmasy basshysynyń orynbasary Erbol Ahmetov.

«Keshe úıdiń tóbesindegishıfer túsirildi-soqqy tolqynynan ustyn aǵashy ortasynan synǵan. Nátıjesinde ony qaıtadan salý úshin barlyq shatyrdy alyp tastady. Barlyǵy jumys isteıdi, rahmet. Úıdiń ishinde bári qalypty. Úılerdi kóshe basynan bastap jóndep keledi, kezek birte-birte bizge deıin jetti», - dedi Arys qalasynyń turǵyny Baıan Naýshabekova.

Jarylys saldarynan qatty zardap shekken sektorlardyń birin Atyraý oblysy óz moınyna aldy. Munda plastıkalyq tereze jasaıtyn 2 shaǵyn tseh ashyldy. Osy jerden terezeler tez arada qurylys alańdaryna jetkizilýde.

«Zardap shekken sektorlardyń biri 483 úıdi qamtıdy. 12 kompanııa olardy qalpyna keltirýmen aınalysýda. Qyzmetkerler sany 400-den astam. Qazir 280-nen astam úı qalpyna keltirilýde. Negizgi zaqym kelgen tustar-úılerdiń shatyry, terezeleri, ishki esikteri men ǵımarattyń qabyrǵalary», - dedi Atyraý oblysy ákiminiń keńesshisi Jasulan Súıinshalıev.

№ 2 Sektordy Pavlodar oblysy qalpyna keltiredi. Osy ákimdikpen bekitilgen aýmaq eń úlken bolyp sanalady, biraq tolqynnyń negizgi soqqysy shaǵyn ýchaskege saı keldi. Osyǵan qaramastan, 28 maýsym men 4 shilde aralyǵynda sarapshylar 327 úıdi, onyń ishinde 5 kópqabatty úıdi tekserdi.

«Qazir 258 páterde qalpyna keltirý jumystary júrgizilýde. Sektorda barlyǵy 171 qurylysshy jumys isteıdi, olardyń sanyn 250-ge deıin arttyrý josparlanýda», - dedi Pavlodar oblysy ákiminiń birinshi orynbasary Ulan Jazylbek.

Qaraǵandy oblysyna bekitilgen № 5 Sektor negizinen kóp páterli úılerdi qamtıdy. Qaraǵandy oblysynyń qurylys jáne sáýlet basqarmasynyń basshysy Taıman Qalmahanovtyń aıtýynsha, qazir 11 kópqabatty úıdiń 9-ynda terezeler almastyrylýda. Jambyl oblysynyń 3 sektorynyń qurylysshylary búgingi kúni 5 úıdi qalpyna keltirýdi aıaqtady.

Esterińizge sala keteıik, Arys aýdanyndaǵy úılerdiń 85% - y jóndeýdi qajet etedi. Elbasynyń jáne Memleket basshysynyń tapsyrmasy boıynsha barlyq búlingen jáne buzylǵan obektiler 2019 jyldyń 1 tamyzyna deıin tapsyrylýy tıis.