Arys qalasyndaǵy dabyl jáne qaýipsizdik júıesi jańartylady
Sonymen birge, Túrkistan oblysynyń damý baǵdarlamasy boıynsha óńirdegi barlyq aýdan, qalalarda da osy baǵytta jumys kúsheıtiledi. Bul týraly búgin Arys qalasyndaǵy brıfıngte Túrkistan oblystyq tótenshe jaǵdaı departamentiniń basqarma basshysy, azamattyq qorǵaý polkovnıgi Baqytjan Zaparov málimdedi.
Onyń aıtýynsha, búginde Arys qalasynda 16 tehnıka men 65 adam kezekshilikte júr. Sonymen birge ol turǵyndarǵa gaz balondaryn qoldanýda órt qaýipsizdigin saqtaý kerektigin eskertti.
QR Qorǵanys mınıstrliginiń ókili, polkovnık Qaıyrgeldi Hýsaınov Arys qalasy men onyń mańyndaǵy 20 shaqyrym aýmaqta tekserý, monıtorıng jumystary júrgizilip jatqanyn málimdedi. Ol áskerı qoımaǵa jaqyn tusta mal jaıýǵa bolmaıtynyn aıtty. Sebebi, munda áli de tazalaý jumystary jalǵasyp jatyr.
«Samuryq-Qazyna» ál-aýqat qory «Nysandar qurylysy jónindegi kompanııa» korporatıvtik qorynyń bas dırektory Arman Jetpisbaıdyń aıtýynsha, ál-aýqat qoryna 66 áleýmettik nysannyń qurylysy tapsyrylǵan.
«Onyń ishinde 54 bilim mekemesi, 8 densaýlyq saqtaý nysany, 4 sport nysany bar. 62 nysan ártúrli deńgeıde kúrdeli jóndeýden ótse, 4 nysan qaıtadan turǵyzylady. Búginde qurylys aýmaǵynda 30 merdiger, 49 tehnıka jáne 1300-den astam qurylysshy jumyldyrylǵan. Bárin ýaqtyly ári sapaly aıaqtaımyz», - dedi A. Jetpisbaı.
Al Arys qalasynyń ákimi Murat Qadyrbek qurylys jumystary joǵary qarqynda qolǵa alynǵanyn, qala qalypty ómirge oralyp kele jatqanyn jetkizdi. Sonymen birge ol Atyraý jáne Jambyl oblysyna tıesili sektorlarda jumys basqalardan góri qarqyndy júrip jatqanyn málimdedi.
