Arys qalasyndaǵy búlingen úıler qalpyna keltirile bastady

ARYS. QazAqparat - Arys qalasynda áskerı polıgondaǵy jarylystyń soqqy tolqynynan zaqymdalǵan úılerdi qalpyna keltirý jumystary bastaldy. Búgingi tańda 247 jeke úı jóndelýde, dep habarlaıdy QazAqparat QR Indýstrııa jáne ınfraqurylymdyq damý mınıstrligine silteme jasap.

Ótken aptada Qazaqstan Respýblıkasy Indýstrııa jáne ınfraqurylymdyq damý mınıstrliginiń Qurylys jáne turǵyn úı-kommýnaldyq sharýashylyq isteri komıtetiniń birinshi vıtse-mınıstri Qaıyrbek Óskenbaev bastaǵan jumys toby tehnıkalyq tekserý júrgizip, Arys qalasynda úılerdiń, ǵımarattar men qurylystardyń zaqymdaný dárejesin anyqtady.

Sapar barysynda komıtet basshylyǵy men mamandarynan quralǵan komıssııa Arys qalasyndaǵy barlyq úıdiń 85% jóndeý jáne qalpyna keltirýdi talap etetinin anyqtady. 752 jumysshynyń qatysýymen 80-nen astam qurylys kompanııasy jóndeý jumystaryn bastady.

Elbasynyń jáne Memleket basshysynyń tapsyrmasy boıynsha barlyq búlingen jáne buzylǵan obektiler 2019 jyldyń 1 tamyzyna deıin qalpyna keltirilýi tıis.

Esterińizge sala keteıik, Túrkistan oblysynyń ákimdigi Arysty 17 sektorǵa bóldi. Osylaısha, eldiń árbir aımaǵy jáne respýblıkalyq mańyzy bar qalalar bekitilgen ýchaskelerge qurylysshylar brıgadasyn jiberip, qalany qalpyna keltirýge qatysady.