Arys qalasynda Tuńǵysh Prezıdent kúnine oraı zamanaýı sport-saýyqtyrý kesheni ashyldy
Balalar men jasóspirimderge arnalǵan sport-saýyqtyrý ortalyǵynyń ashylý saltanatyna «Samuryq-Qazyna» jyljymaıtyn múlik qory» AQ Basqarma tóraǵasy Arman Jetpisbaev pen Arys qalasynyń ákimi Murat Qadyrbek qatysty.
Aıta keteıik, sport-saýyqtyrý kesheniniń qurylysy tamyz aıynda bastalǵan bolatyn. Onda jergilikti turǵyndardyń kúres, aýyr atletıka, dzıýdo, sambo, shahmat, basketol, voleıbol sekildi sport túrlerimen shuǵyldanýyna bar múmkindik jasalǵan.
«Jekemenshik áriptestik sheńberinde boı kótergen zamanaýı jańa sport kesheninde bir mezgilde 120 sportshynyń jattyǵýyna barlyq jaǵdaı jasalǵan. Záýlim ǵımaratta sport súıer azamattar men jas balalar, jalpy arystyqtar sportpen aınalysa alady. Sonymen qatar bul shańyraqta el namysyn qoldan bermeıtin bolashaq Olımpıada chempıondary tárbıelenedi dep senemiz»,– dedi quttyqtaý sózinde «Samuryq-Qazyna» jyljymaıtyn múlik qory» AQ Basqarma tóraǵasy Arman Jetpisbaev.
Eske salaıyq, «Samuryq-Qazyna» ál-aýqat qory qaladaǵy 68 nysandy qalpyna keltirýge qol ushyn sozyp, 53 bilim berý nysany, 8 densaýlyq saqtaý, 4 sport, 3 qoǵamdyq oryn nysandaryn tolyq jóndeýden ótkizdi. Sondaı-aq, Arys qalasyndaǵy temir jol vokzaly, «Batyrlar Alleıasy» men 1200 oryndyq ortalyq alań tolyq qaıta qalpyna keltirildi. 16 mektep jańa jıhazben qamtamasyz etildi. Sport jáne oıyn alańqaılary jóndeýden ótti.
Jalpy, Túrkistan oblysynda 64 sport nysany jumys isteıdi. Onyń 4-i Arys qalasynda ornalasqan. Bıyl oblys boıynsha 3 sport kesheni halyq ıgiligine paıdalanýǵa berilse, kelesi jyly dál osyndaı 11 nysannyń qurylys jobasy daıyndalǵan.Buqaralyq sportty damytý maqsatynda jyl basynan beri 4 myńǵa jýyq is-sharalar ótkizilip, oǵan 436 myńnan astam adam qatysty. «2019 jyl – Jastar jyly» aıasynda eresekter arasynda 9 sport túrinen Spartakıada ótti. Oblys kóleminde 52 (26 olımpıadalyq, 26 olımpıadalyq emes) sport túrleri damytylýda.
Óńir sportshylary sporttyń 52 túri boıynsha QR chempıonattaryna qatysyp, 215 – altyn,174 – kúmis, 237 – qola medal jeńip aldy. Bıyl 2 halyqaralyq dárejedegi sport sheberi, 4 QR sport sheberi, 116 sport sheberine úmitker sportshylar daıyndaldy.
