Arys qalasynda muqtajdarǵa tegin azyq-túlik taratatyn áleýmettik dúken ashyldy

ARYS. QazAqparat - Arys qalasynda muqtaj jandarǵa arnalǵan áleýmettik dúken ashyldy. Jaǵdaıy tómen otbasylar men kómekke zárý turǵyndarǵa arnalǵan dúkende azyq-túlik pen kıim-keshekten bastap turmystyq tehnıka syndy kóptegen zattar tegin taratylady, dep habarlaıdy QazAqparat tilshisi.

Qala tarıhynda alǵash ret ashylǵan «Áleýmettik dúken» sóz ben meıirimge muqtaj jandardyń qajettiligin óteýge sebepker bolmaq. Saýda ornynyń ashylý rásimine qala ákimi Gúljan Qurmanbekova men zııaly qaýym ókilderi jáne qala turǵyndary qatysyp, usynys pikirlerin ortaǵa saldy.

«Qalamyzda alǵash ret iske qosylǵan bul dúken «Qolǵabys» qoǵamdyq qorynyń bastamasymen ashylyp otyr. Munda kıim-keshekten bastap, aıaq kıim, oıynshyq, balalarǵa arnalǵan arba, ydys-aıaq, turmystyq tehnıkamen qosa azyq-túlik ónimderine deıin bar. Jany jomart jandar tabystaǵan turmysqa qajetti zattardy dúken qyzmetkerleri muqtaj otbasylarǵa tegin beretin bolady», – deıdi Gúljan Qurmanbekova.

«Qolǵabys» qoǵamdyq qorynyń jetekshisi Syrlybek Musabekovtiń aıtýynsha, dúken esigi kópbalaly otbasylar men múmkindigi shekteýli jandarǵa jáne jalǵyzbasty analar úshin árdaıym ashyq bolmaq. Aıta keteıik, qala kásipkerleri men qoǵam belsendileri atsalysqan ıgi joba aıasynda 3 adam turaqty jumyspen qamtylyp otyr.