Arys qalasynda eshqandaı radıatsııa joq - Jandarbek Bekshın

ARYS. QazAqparat - Túrkistan oblysynyń ákimi Ómirzaq Shókeev aldaǵy úsh kúnde evakýatsııalyq qabyldaý ortalyqtarynyń jumysyn kúsheıtip, gýmanıtarlyq kómek berý sharasy jalǵasatynyn atap ótti.

BAQ ókilderimen kezdesý barysynda ákim Arys qalasyndaǵy nysandar qalpyna keltirilip, turǵyndardyń jaǵdaıy jasalatynyn jetkizdi, dep habarlaıdy QazAqparat tilshisi.

Brıfıng barysynda sóz alǵan elimizdiń bas sanıtary Jandarbek Bekshın jarylys bolǵan temirjolshylar qalasynda dezınfektsııa jumystary júrgiziletinin aıtty.

«Qoǵamdyq oryndar, qoqys konteınerleri, nysandar tolyq tazalanady. Qaladaǵy aýyz sý júıesi qatań qadaǵalanady. Sý quramy, qubyrlar tekseriledi. Evakýatsııalyq oryndarda da mamandarymyz jumys istep jatyr. Jalpy Túrkistan oblysynda epıdemıologııalyq jaǵdaı turaqty», - dedi Jandarbek Bekshın.

Sondaı-aq baspasóz máslıhatynda veterınar mamandar Arystaǵy úı aýlasynda qalǵan tórt túlik boıynsha jumys júrgizetinin jetkizdi. Ólgen mal zalalsyzdandyrylyp, zańǵa sáıkes ótemaqy berý joldary qarastyrylady.