Arys qalasynda balalardyń joǵalýy týraly aqparat tekserilip jatyr - ІІM
«Arys qalasynda polıtsııa qyzmetkerleri qoǵamdyq tártipti saqtaýǵa, evakýatsııalanǵan azamattardyń múlkin kúzetýge tartyldy. Jalpy, jeke quramnyń 463 qyzmetkeri men Іshki ister mınıstrligi bólinisteriniń 53 tehnıkasy Arys qalasynan kóshirilgenderge kómek kórsetýde. Munyń ishinde 193 qyzmetker jáne 23 tehnıka azamattyq qorǵaý organdaryna tıesili. Sondaı-aq 270 qyzmetker men 30 tehnıka polıtsııa bólinisterinen tartyldy», - dep atap ótedi mınıstrlikten.
Vedomstvo málimetinshe, Arys qalasyndaǵy qoǵamdyq tártipti qadaǵalaý úshin QR Ultyq ulanynyń áskerı bóliminen 500 jaýynger joldandy.
«Osy fakti boıynsha ІІM-niń ońtústik óńirlik áskerı-tergeý basqarmasynyń Shymkent bólimi Qylmystyq kodekstiń 462-babynyń 1-bóligi (qarý, sondaı-aq basqalarǵa qaýip týdyratyn zattar men nárselerdi saqtaý erejesin buzý) boıynsha qylmystyq is tirkedi. Barlyq jaǵdaı ishki ister organdarynyń qadaǵalaýynda», - delingen taratylǵan aqparatta.
Sondaı-aq, mınıstrlik áleýmettik jelilerde Arys qalasynda balalardyń joǵalýy týraly aqparat taralǵanyn jáne bul aqparat tekserilip jatqanyn atap ótedi.
«Oqıǵa ornynan kóshirilgenderdiń ornalasqan jerlerin anyqtaý sharalary júrgizilip jatyr. Іshki ister mınıstrligi turǵyndardy úreıge boı aldyrmaýǵa shaqyrady. Resmı aqparattarǵa ǵana súıený qajettigin eskertedi. Shymkent qalasynyń Tótenshe jaǵdaılar departamentinde shuǵyl jeli ashyldy. Onda kez kelgen aqparatty táýlik boıy alýǵa bolady. Jeli nómiri 8 (7252) 44-94-72», - dedi mınıstrlikten.
Búgin tańerteń Túrkistan oblysynyń Arys qalasyndaǵy áskerı bólim qoımasynda jarylys boldy. Birneshe óńirdiń Tótenshe jaǵdaılar departamenti shuǵyl jeliler qurdy. Kóp uzamaı oblys basshysy Ómirzaq Shókeev bastaǵan arnaıy komıssııa Arystaǵy áskerı bólimge attandy.Jaǵdaıdyń aýqymymen tanysqan óńir ákimi Arys turǵyndaryn evakýatsııalaý týraly sheshim qabyldanǵanyn málim etti. QR ІІM Tótenshe jaǵdaılar komıteti turǵyndar qaıda jáne qalaı evakýatsııalanyp jatqanyn habarlady.
QR Prezıdenti Qasym-Jomart Toqaev tıisti organdarǵa Arystaǵy tótenshe jaǵdaıdyń zardaptaryn joıý týraly tapsyrma berdi.
QR Qorǵanys mınıstrligi resmı aqparat taratyp, túske deıingi ýaqyttaǵy jaǵdaı boıynsha zardap shekkender joqtyǵyn aıtty. Keıin habarlanǵandaı, oqıǵa ornyna Qorǵanys mınıstri Nurlan Ermekbaev ushyp shyqty.
Oqıǵa saldarynan zardap shekken 11 adam Shymkent aýrýhanasyna jetkizildi.
Túrkistan oblysynyń aýrýhanalaryna 31 adam tústi.
