Arys qalasynda Abaı eskertkishi ashyldy

TÚRKІSTAN. QazAqparat- Táýelsizdiktiń 30 jyldyq merekesine jáne Arys qalasynyń 65 jyldyǵyna oraı qazaqtyń uly aqyny Abaıǵa arnalǵan bıýst ashyldy, dep habarlaıdy QazAqparat tilshisi.

Óner týyndysyn Qazaqstannyń eńbek sińirgen qaıratkeri, akademık ári Arys qalasynyń týmasy Tileýberdi Bınashev syıǵa tartty.

Saltanatty is-sharada Túrkistan oblysynyń ákimi Ómirzaq Shókeev arystyqtardy merekemen quttyqtady.

– Álemge tanymal bas aqynymyzdyń eńbegin halyq bolyp ulyqtaý memleketimizdiń mereıin arttyrady. Uly oıshyldyń asyl murasyn ardaqtaý jáne jan-jaqty dáripteý – bárimizge ortaq mindet. Ol úshin búgingi býyn Abaı murasynan nár alyp, rýhanı kemeldenýi tıis. Qazaqstan Respýblıkasynyń Prezıdenti Qasym-Jomart Kemeluly: «Abaı qazaqtyń ár balasyn ultjandy azamat etip tárbıeleýge shaqyrdy. Onyń murasy – parasatty patrıotızmniń mektebi, eldikti qadirleýdiń negizi. Sondyqtan, azamattarymyzdyń kózi ashyq bolsyn desek, Abaıdy oqýdan, aqyn óleńin jattaýdan jalyqpaǵan jón» dep atap ótti. Olaı bolsa, ortalyq kitaphana aldynda boı kótergen eńseli eskertkish jastarymyzdy Abaı armandaǵan kemeldikke jeteleıdi dep senemin, – dedi oblys ákimi.

Bıýst uly aqynnyń esimin jas urpaqqa keńinen nasıhattaý maqsatynda, qalalyq ortalyqtandyrylǵan kitaphanalar júıesi mekemesiniń aldyna ornatyldy.

Eskertkishtiń bıiktigi – 4 metr, tuǵyry – 2,20 metr, bıýstiniń bıiktigi – 1,50 metr.

Tuǵyry granıt-mramordan jasalǵan. Eńseli eskertkishtiń aınalasyna kógaldandyrý jumystary júrgizilip, 7 jaryqsham, 7 oryndyq, 2 projektor qoıyldy.