Arys qalasynda 26 myń sharshy metr turǵyn úı paıdalanýǵa berildi
ShYMKENT. QazAqparat - Ońtústik Qazaqstan oblysy Arys qalasynda ótken jyly 985 mln teńgege 26 myńǵa jýyq sharshy metr úı salynyp, paıdalanýǵa berilgen. Al, bıyl 5900 sharshy metr páter el ıgiligine beriledi. Bul týraly óńirlik kommýnıkatsııalar qyzmetinde ótken brıfıngte qala ákimi Murat Qadyrbek málim etti, dep habarlaıdy QazAqparat tilshisi.
Murat Bolatulynyń sózinshe, ótken jyly aýdanda óndirilgen jalpy ishki ónim kólemi 32,8 mlrd teńgeni quraǵan. Bıylǵy jyly qala ekonomıkasynyń ishki ónim kólemin 33,8 mlrd teńgege jetkizý josparlanyp otyr.
«Byltyr qalanyń ónerkásip kásiporyndarynda 8 mlrd 782 mln teńgeniń ónimi óndirilip, ónerkásip óniminiń naqty kólem ındeksi 104,6 paıyzdy qurady. Bıyl ónerkásip óniminiń naqty kólem ındeksin 105 paıyzǵa jetkizý kózdelip otyr. Sondaı-aq, kásipkerlikti qoldaý kartasy aıasynda bıylǵy jyly jalpy quny 8 mlrd 680 mln teńgeni quraıtyn 8 joba iske qosylyp, 172 jumys oryndary ashylatyn bolady», - dedi aýdan basshysy.
Budan ózge, toǵyz joldyń torabynda ornalasqan aýdanda negizgi kapıtalǵa tartylǵan jalpy ınvestıtsııa kólemi 5 mlrd 831 mln teńgege jetken. Ónerkásip, shaǵyn jáne orta kásipkerlik, týrızm jáne aýylsharýashylyǵy salalarynda iske asyrylatyn jobalardyń esebinen bıýdjettik emes ınvestıtsııa kólemi 2 mlrd 864 mln teńgeni quraıdy dep josparlanyp otyr.
«Bıznestiń jol kartasy 2020» bıznesti qoldaý men damytýdyń biryńǵaı baǵdarlamasy aıasynda 3 jobaǵa qoldaý kórsetilipti. Aǵymdaǵy jyly atalǵan baǵdarlama aıasynda 7 jobaǵa qoldaý kórsetiletin bolady. Onyń 3-eýi sýbsıdııalaý, 2-eýi kepildendirý, 1-eýi grant, 1-eýi ınfraqurylym boıynsha júzege aspaq»,- dedi Murat Qadyrbek.
