Arys qalasynda 2 myńnan astam úı jóndelip bitti

ARYS. QazAqparat - Arys qalasyn qalpyna keltirý jumystary qarqyndy júrip jatyr. Búgingi tańda 17 sektorda qolǵa alynǵan qurylys jumysynyń kóbi ketip, azy qalǵan, dep habarlaıdy QazAqparat oblys ákiminiń baspasóz qyzmetine silteme jasap.

Máselen, Jambyl oblysy 3 sektordaǵy 312 úıdi berilgen merzimde 100 paıyz jóndep bitemiz dep otyr. Qazirgi tańda onda 438 adam jumyldyrylǵan. Bul týraly jýrnalıstermen ótken baspasóz máslıhatynda Jambyl oblysy ákiminiń orynbasary Erkebulan Daýylbaev málimdedi. Jalpy árbir sektordaǵy jumystardy júrgizý úshin oblys, qalalardan 7576, oblys aýdandarynan 315 jumysshy tartylǵan.

«Arys qalasynda jańadan 107 jeke turǵyn úı men 1 kópqabatty úıdi qaıta soǵý jumystary júrgizilýde. Zerdeleý jumystarynyń nátıjesinde 7252 jeke turǵyn úı men 98 kópqabatty úıge aqaý aktileri jasalǵan. Al 4669 jeke úı men 88 kópqabatty úıde jóndeý jumystary bastalǵan bolatyn. Qalany qurylys qaldyqtarynan tazartý maqsatynda 117 tehnıka jumyldyrylǵan, shyǵarylǵan qoqys kólemi 30551 tonnany quraıdy», – dedi Arys qalasanyń ákimi Murat Qadyrbek.

Aıta ketý kerek, Arys qalasynda 66 áleýmettik nysandy qalpyna keltirý «Samuryq-Qazyna» ál-aýqat qoryna tapsyrylǵan. Onyń 54-i - bilim nysandary, 8-i - densaýlyq saqtaý, 4-ýi - sport nysandary. Áleýmettik ınfraqurylym boıynsha 66 nysanda qurylys jumystary qarqyndy júrgizilýde. Tıisti qurylys jumystaryna 1097 qurylysshy maman tartylǵan.

Búgingi tańda Arysta 2161 baspananyń jóndeý jumystary bitken.