Arys qalasynda 181 úı tolyq jóndeýden ótti

ARYS. QazAqparat - Arys qalasyn jarylǵysh zattardan túgeldeı tazartý jumystary jalǵasýda. Bul týraly Arys qalasy ákimdiginiń májilis zalynda ótken brıfıngte QR Qorǵanys mınıstrliginiń ókili Ermııan Bıatov málimdedi, dep habarlaıdy QazAqparat oblys ákiminiń baspasóz qyzmetine silteme jasap.

Onyń sózinshe, qazirgi tańda turǵyndarǵa eshqandaı qaýip joq.

Jýrnalısterdiń suraǵyna jaýap bergen QR Qorǵanys mınıstrilginiń ókili, Arys qalasynyń turǵyndarynan qońyraýlar tolassyz kelip túsip jatqanyn jetkizdi.

«Jalpy, búgingi tańǵa deıin 30 700 jarylǵysh oq-dári bólshekteri tabylǵan. Qazirgi ýaqytta osy tabylǵan fragmentter qaladan 60 shaqyrym tysqary ornalasqan arnaıy polıgonǵa jetkizilgen. Aldaǵy ýaqytta onyń barlyǵy joıylady. ıAǵnı, adam ómirine qaýipti emes» - dedi E. Bıatov.

Áli de jarylysqa baılanysty qyzmettik tekseris júrip jatqanyn jetkizgen jaýapty basshylar oq-dári saqtalǵan qoımanyń kóshiriletinin taǵy da aıtyp ótti.

Aıta keterligi, 17 sektor boıynsha barlyq úıler jóndelýde. Baspanalardyń búlingen shatyrynan bastap, jarylǵan qabyrǵalar men synǵan terezeler qalpyna keltirilýde. Qosymsha sektorlarǵa bólingen qyzmetkerler aqaý aktilerin túzýmen aınalysýda. Oblys pen aýdandardan 1500-den astam qurylysshy jumyldyrylǵan.

Búgingi tańda 700-den astam turǵyn úıde jóndeý jumystary bastalǵan. 4 shildedegi aqparat boıynsha, Arys qalasynda 181 úıdiń aqaýlary tolyǵymen qalpyna kelgen. Bul baǵytta jumystar jalǵasýda.

Arys qalasynyń ákimi Murat Qadirbektiń málimetinshe, búgingi kúni shaharda turǵyndar kúndelikti tirshiligine qaıta oralý úshin barlyq jaǵdaı jasalǵan. Qalanyń ishinde 30 shaqty dúken jumysyn bastady. 4 naýbaıhana suranysqa saı nan pisirip, qyzmetine kirisken. Avtoparkter de tolyǵymen jumystaryn atqarýda. Sonymen qatar, jergilikti halyq ataýly áleýmettik kómek, jalaqy, zeınetaqy syndy tólemderdi túgel alýda.