Arys qalasynda 155 úı buzylyp, qaıta turǵyzylýda

NUR-SULTAN. QazAqparat - 23 shildege qaraı qurylysshylar 1963 jeke turǵyn úı qurylysy jáne kóp páterli turǵyn úı obektilerin tapsyrdy. Kún batqanǵa deıin Arys qalasynda qalpyna keltirilgen úılerdiń sany 2 myńǵa jetedi. Bul týraly QR Úkimetniń baspasóz qyzmeti habarlady.

Aı basynan beri Arys qalasynda shyjǵyryp turǵan kún astynda 7367 qurylysshy eńbek etýde, olardyń qatary kún saıyn birneshe ondaǵan adamdarmen tolyǵýda. Sonymen birge, óńirler men respýblıkalyq mańyzy bar qalalar 5 myńǵa jýyq jeke turǵyn úı men kóp qabatty úılerdi qalpyna keltirýde. Qurylys brıgadalary 155 úıdi buzyp, qaıta turǵyzyp jatyr.

Alaıda, Qurylys jáne TKSh isteri komıtetiniń málimetteri boıynsha, mamandar áli kúnge deıin 51 úıge qol jetkize almaı otyrǵandyqtan, tekserý júrgizý, jóndeý jumystaryn bastaý múmkin bolmaı tur.

Esterińizge sala keteıik, Arys qalasyndaǵy áskerı polıgonda bolǵan jarylystan barlyq turǵyn úı qorynyń 85%-y zardap shekken bolatyn. Nysandardy qalpyna keltirýge baqylaý jáne monıtorıng kún saıyn júrgizilýde.