Arys qalasynda 14 mVt elektr qýatyn óndiretin kún elektr stansasy iske qosylady
ARYS. QazAqparat - Túrkistan oblysynyń ákimi Ómirzaq Shókeev Arys qalasyna arnaıy jumys saparymen bardy, dep habarlaıdy QazAqparat óńir basshysynyń baspasóz qyzmetine silteme jasap.
Aldymen aımaq basshysy Aqdala aýyldyq okrýgindegi «Qazyna jer LTD» JShS-ne aıaldady. Sút óndirýmen aınalysatyn seriktestik 2012 jyly qurylǵan. Mekemeniń ıeliginde 2858 gektar jeri bar. Fermada golshtın-frız tuqymdy 1200 bas iri qara baǵylýda. Ár sıyr táýligine 26 lıtrge deıin sút beredi. Munda 52 adam turaqty jumyspen qamtylǵan.
Sondaı-aq, oblys ákimi Arys qalasynda ornalasqan «Arys mıneraldy sý» JShS-ne bardy. Alkogolsiz sýsyndar shyǵaratyn seriktestik 2018 jyly qurylǵan. 1 gektar aýmaqta ornalasqan jobanyń ınvestıtsııalyq quny 250 mln teńge. Tseh jylyna 18 mln lıtr sý shyǵarýǵa qaýqarly. Mekeme basshysy aldaǵy ýaqytta tátti sýsyn túrlerin shyǵarýdy josparlap otyr.
Sapar barysynda Ómirzaq Estaıuly «Aýylym - altyn besigim» jobasy aıasynda atqarylatyn jumys josparymen tanysty. Baǵdarlamada Arys qalasyn kógaldandyrý, saıabaqtardy qaıta jańǵyrtý jumystary qaralǵan. Sonymen qatar, salynǵaly jatqan oqýshylar saraıy, jazǵy saýyqtyrý lageri jáne sport kesheniniń jobasyn kórdi. Qazirgi tańda Arys qalasynda dene shynyqtyrý - saýyqtyrý kesheni jumys istep keledi. 2015 jyly paıdalanýǵa berilgen keshende sporttyń birneshe túri boıynsha úıirmeler jumys isteıdi.
Atqarylyp jatqan jumystarmen tanysyp shyqqan aımaq basshysy «Aýylym - altyn besigim» jobasyn júıeli túrde iske asyra otyryp, qala jáne eldi mekenderde abattandyrý jumystaryn kúsheıtýdi tapsyrdy. Áleýmettik nysandar salarda halyqqa birinshi kezekte qajettilik týdyryp turǵan jobalardy qolǵa alý kerektigin aıtty. Sondaı-aq, aýyl sharýashylyǵy salasynyń damýyn qarqyndatýǵa kúsh salý kerektigin jetkizdi. Mundaı jumystar úshin memleket tarapynan tıisti qoldaýlar men jeńildikterdiń qaralyp jatqanyn taǵy da eske saldy.
Odan bólek, oblys basshysy «KazGreenTekSolar» JShS-ne tıesili kún sáýlesinen balamaly elektr energııasyn óndiretin stansa qurylysynyń jumystarymen tanysty. Frantsııalyq «ÝrboSolar» kompanııasymen birlesken jobaǵa jeke jáne Eýropalyq damý bankinen 7 mlrd teńge qaralǵan. Stansanyń jalpy aýmaǵy 30 gektar jerdi alyp jatyr. Aldaǵy ýaqytta kún elektr stansasy 14 mVt elektr qýatyn óndiretin bolady. Joba iske qosylǵanda 30 adam turaqty jumysqa ornalasady.
Aımaq basshysy Baıyrqum aýyldyq okrýginde qurylyp jatqan "International company of Cotton" kompanııasynyń SPK-1 aýylsharýashylyq óndiristik kooperatıvinde de boldy. 2020 jylǵa deıin júzege asyrylatyn jobanyń jalpy ınvestıtsııalyq quny 5 mlrd teńgeni quraıdy. Kooperıv menshiginde 5 myń gektar egistik jer bar. Birinshi etap boıynsha 2 myń gektar jerdi jyl sońyna deıin ıgeretin bolsa, qalǵan jerdi kelesi jyly paıdalanatyn bolady. Jobanyń ereksheligi - gektarynan 6-8 tonna shıtti maqta, 40 paıyz talshyqty maqta óndiredi. Bul tehnologııa sý shyǵynyn 5 esege deıin tómendetedi. Kooperatıv tolyq iske qosylǵanda 500 adam turaqty jumyspen qamtylatyn bolady.
