Arys qalasynda 136 úı qalpyna keltirildi
Arys qalasyndaǵy úılerdiń 85%-y jóndeýdi qajet etedi, al qalada jumys isteıtin qurylys kompanııalarynyń sany 118-ge deıin artty. Búgingi kúni turǵyn úıdi qalpyna keltirý boıynsha aýqymdy is-sharaǵa 1546 qurylysshylar qatysyp, 86 arnaıy tehnıka tartyldy.
Vıtse-mınıstr Qaıyrbek Óskenbaev bastaǵan jumys toby qazir Arys qalasynda. Jaqynda ol Arys qalasyndaǵy barlyq úılerdi baqylaýǵa alatynyn jáne kúndelikti monıtorıngte ustaıtynyn habarlady.
«Biz árbir turǵyn úıdi turaqty baqylaýǵa aldyq. Eger tipti jeldetkish nemese terezeniń áınegi synǵan bolsa da, biz bul jaıttardyń barlyǵyn eskerdik jáne jóndeýge muqtaj turǵyn úı nysany retinde tirkeýge aldyq. Sondyqtan árbir úı boıynsha-jeke tásil, bir jerde áınekteý, bir jerde shatyrdy aýystyrý jumystaryn júrgizý qajet. Keıbir úılerdi buzý jáne qaıta salý kerek. Qazir shyǵyn somasyn jáne qalpyna keltirý úshin qajetti qarajatty anyqtaý maqsatynda baǵalaý júrgizemiz»,-dedi Qaıyrbek Óskenbaev.
Arys 17 sektorǵa bólinip, árqaısysy elimizdiń barlyq óńirleri men respýblıkalyq mańyzy bar qalalaryna bekitip berildi. Turǵyn úılerdi qalpyna keltirý boıynsha shyǵyndardyń bir bóligin bekitilgen jergilikti atqarýshy organ ózine alady, al shyǵyndardyń qalǵan bóligi respýblıkalyq bıýdjet qarajaty esebinen jabylady. Kún saıyn saǵat 19.00-de barlyq ákimdikter turǵyn úı qoryn jóndeý boıynsha atqarylǵan jumystar týraly baıandaıdy.
Sondaı-aq, qalada barlyq buzylǵan ınfraqurylymdy: ınjenerlik kommýnıkatsııalar men joldardy qaıta qurý jumystary júrgizilýde. Bul maqsatqa Úkimet rezervinen qarajat bólindi.
Áleýmettik ınfraqurylym nysandaryn qalpyna keltirý «Samuryq-Qazyna» AQ qarajaty esebinen júrgiziledi, al Arys qalasynyń kásipkerlerine «Atameken» UKP arqyly qarajat baǵyttaıtyn iri bıznes ókilderi kómektesýge daıyn. Elbasynyń jáne Memleket basshysynyń tapsyrmasy boıynsha barlyq búlingen jáne buzylǵan obektiler 2019 jyldyń 1 tamyzyna deıin tapsyrylýy tıis.
