Arys qalasynda 1 875 úı qalpyna keltirildi

ARYS. QazAqparat - Búgingi tańda Arys qalasyndaǵy 1 875 úıde qalpyna keltirý jumystary aıaqtaldy, dep habarlaıdy QazAqparat QR Indýstrııa jáne ınfraqurylymdyq damý mınıstrliginiń baspasóz qyzmetine silteme jasap.

Baspasóz qyzmetiniń málimetinshe, 17 sektorǵa bólingen qalada qazir 7 324 jumysshy isteıdi. Olar 4 804 jeke turǵyn úı men kóp qabatty úıdi jóndeıdi.

Qurylysshylar aptap ystyqqa qaramastan eńbek etýde. Kúndiz Arysta termometr baǵanasy 45 gradýstan tómen túspeı tur.

«Jumys kúni tańǵy altydan bastalady jáne saǵat 13.00-ge deıin jalǵasady. Sodan keıin saǵat 13.00-den 16.00-ge deıin úzilis jarııalaımyz. Qurylysshylarǵa demalys beremiz, óıtkeni aptap ystyq kúnniń astynda júrý múmkin emes. Saǵat tórt jarymdar shamasynan bastap keshke deıin jóndeý jumystaryn jalǵasady. Basqalaı bolýy múmkin emes», - dedi vıtse-mınıstr Qaıyrbek Óskenbaev.

Esterińizge sala keteıik, QR IIDM vıtse-mınıstri Arys qalasynda tótenshe jaǵdaıdyń alǵashqy kúnderinen beri jumys isteýde. Mınıstrlik mamandary qurylys barysyn qadaǵalaıdy. Qalany qalpyna keltirýge eldiń barlyq óńirleri men respýblıkalyq mańyzy bar qalalar qatysýda.