Arys qalasynan 100 bala Mańǵystaýǵa keldi

AQTAÝ. QazAqparat - Búgin Arys qalasynan 100 bala Mańǵystaý óńirine kelip jetti. Olar ári qaraı «Alaý» lagerine barady, dep xabarlaıdy QazAqparat tilshisi.

100 balany oblystyq bilim basqarmasy jáne «Mańǵystaýmunaıgaz» AQ qyzmetkerleri sán-saltanatpen qarsy aldy. Mańǵystaý vokzalynda dastarqan jaıylyp, kishkentaı meımandar baýyrsaq pen shubattan dám tatty. Merekelik kontsert boldy.

«Aqtaýǵa alǵash ret keldim. Kaspıı teńizi týraly kóp estidim. Poıyzben jaqsy keldik, balalarmen bárimiz qýanyshtymyz. Jaqsy demalamyn dep oılaımyn»,-deıdi 5-synyp oqýshysy Aıda Ǵıbatýllaeva.

Balalardyń ýaqytyn tıimdi ótkizip, densaýlyǵyn nyǵaıtýdy kózdeıtin «Alaý» saýyqtyrý lageri 1987 jyly «Mańǵystaýmunaıgaz» kompanııasynyń jáne jumysshylardyń kúshimen salynǵan. Osy 30 jyldyń ishinde «Alaýda» 30 myńǵa jýyq bala demalǵan. Munda balalar kúnine 5 mezgil tamaqtanady. Olar Aqtaý qalasynyń kórikti jerlerin, murajaı men botanıkalyq baqty aralap, kınoteatrlarda, oıyn-saýyq attraktsıonynda alańsyz demalyp, kóńil kóteredi.

Odan bólek, bekire fermasy, túıequs sharýashylyǵynyń jumysyn tamashalap, túrli sala qyzmetkerlerimen kezdesý uıymdastyrylady.

Tamyz aıynda Arys qalasynan taǵy 50 bala Aqtaýdaǵy «Baldáýren» balalar lagerinde demalady dep josparlanyp otyr.