Arys qalasyna Qostanaı oblysynan 30 tonna áleýmettik kómek jóneltildi
Arys qalasyndaǵy jaǵdaıǵa baılanysty, Qostanaı oblysynyń ákimi Arhımed Muhambetovtyń basshylyq etýimen arnaıy jedel shtab quryldy. Al búgin Arys qalasyndaǵy azamattarǵa kómek kórsetý maqsatynda 20 tonna un, 7 tonna makaron men 3 tonna kondıterlik ónimder tıelgen júk kólikteri jolǵa shyqty.
«Jaısyz habar jetkennen-aq Tobyl óńiriniń jurtshylyǵy qınalǵan aǵaıynǵa qoldaý bildirip, qol ushyn berýge asyqty. Muqtaj jandarǵa qol ushyn sozǵysy keletin jekelegen adamdar «Nur Otan» partııasynyń fılıaly janynan qurylǵan arnaıy beketke bara alady. Osyndaı sátte yntymaq tanytýymyz qajet», - deıdi «Nur Otan» partııasy QOF tóraǵasynyń birinshi orynbasary Jańabaı Bısimbaev.
Sondaı-aq, partııa qyzmetkerleri bir kúndik eńbek jalaqysyn Arys turǵyndaryna kómektesý úshin arnaıy shotqa aýdardy. Qarjylaı kómek kórsetkenderdiń arasynda qostanaılyq bıznes ókilderi de bar. Máselen, jergilikti kásipker, «Nur Otan» partııasynyń múshesi Sergeı Blok jaǵdaıdy estigen boıda bir mıllıon teńge, QR Eńbek eri Almat Tursynov basshylyq etetin «Qarasý» seriktestigi 3,5 mıllıon teńge aýdardy.
Budan bólek, Arys qalasynyń turǵyndaryna kómek beremin degen jandar «Nur Otan» partııasy oblystyq fılıalyna júgine alady. Qazirdiń ózinde qala-aýdandardan, kásipkerlerdiń atynan jetken júkter beket basyna jınaqtalyp jatyr.
«Bul jumystar Arystaǵy jaǵdaı turaqtalǵansha jalǵasa beredi», deıdi uıymdastyrýshylar.
