Arys qalasyn qalpyna keltirýge 4 myńǵa jýyq jumysshy jumyldyryldy
Jarylystan japa shekken qalany qaıta qalpyna keltirý jumystaryna elimizdiń barlyq óńirinen qurylysshylar tartyldy. Máselen, Túlkibas aýdany men Almaty qalasyna bekitilgen 14-sektorda 531 nysandy qalpyna keltirý jumysy júrip jatyr. Onyń ishinde 503-i jóndeý jumystaryn qajet etse, 28 úıdiń qabyrǵalary tolyqtaı súrilip, jańadan salynýda. Jumysqa 5 kompanııa, 300-den astam qurylysshy tartylǵan.
Al, Soltústik Qazaqstan oblysy men Ordabasy aýdanyna qarasty 13 sektorǵa bekitilgen 17 kóshedegi 371 turǵyn úıdiń jaǵdaıyn zerdelep, zaqym kelgen 198 baspananyń jóndelýine kúsh salyndy. Sondaı-aq, ataýly áleýmettik kómekke qujat rásimdeý úshin de tıisti mamandar bólinip, jumys júrgizilgen. Bul aýmaq boıynsha birjolǵy járdemaqy 18 jasqa tolǵan 954 turǵynǵa bank kartochkalary arqyly taratylyp berildi. Atalǵan sektorda qurylys nysandaryn qalpyna keltirý sharalary tolyǵymen aıaqtalyp, arystyqtar qonys toıyn toılap úlgerdi.
Osy óńirlerge qarasty sektordyń jetekshileri saltanatty shara uıymdastyryp, eleýli eńbek etken jumysshylar men belsendilerdi marapattady. Ádimdik ókilderi turǵyndardy úılerine baryp quttyqtap, olarǵa turmystyq tehnıka syıǵa tartty.
Temirjolshylar qalasyndaǵy Jambyl oblysy men Shardara aýdanyna tıesili 3-sektordaǵy qurylys jumystarynyń aıaqtalýyna oraı da saltanatty shara ótti. Jıynda Túrkistan oblysy ákiminiń birinshi orynbasary Qosman Aıtmuhametov pen Jambyl oblysy ákiminiń orynbasary Erkebulan Daýylbaev Arys qalasyn qaıta qalpyna keltirýge atsalysqan qurylysshylar men belsendi azamattarǵa alǵys aıtty. Aıtýly sharada Arys qalasyndaǵy qurylys-jóndeý jumystaryna belsene aralasqan qurylysshylar, merdigerler, belsendi azamattar men ákimdik qyzmetkerleri arnaıy alǵys hatpen marapattaldy. Shara aıasynda jarylys kezinde qırap, qaıta salynǵan 4 úı saltanatty túrde ıelerine tabystaldy. Bul úılerdiń ekeýi qaıta salynyp, ekeýi tolyq jańǵyrtylǵan. Qurylysyn júrgizgen merdiger kompanııa atalǵan úı ıelerine syı-sııapat jasady.
Aıta keterligi, Arys qalasyndaǵy Jambyl oblysynyń shtabyna qarasty 3-sektorǵa 11 kóshe bekitilgen. Onda 312 jeke turǵyn úımen birge 14 áleýmettik jáne kommertsııalyq nysan bar. Zerdeleýden ótken jeke turǵyn úıdiń barlyǵynyń aqaý aktileri toltyrylyp, smetalaý jumystary jasalǵan. Nátıjesinde qıraǵan 4 úı qaıta salynyp, qalǵan 309 úıge túrli jóndeý jumystary júrgizilip, qalpyna keldi. Bul jumystarǵa 4 merdiger kompanııa, 500-den asa qurylysshy tartylǵan. Tıisti shyǵyndar respýblıkalyq bıýdjet pen arnaıy qorǵa jınaqtalǵan qarjydan qarastyryldy.
Qaraǵandy oblysy men Tólebı aýdanyna tıesili 5 sektorda da qurylys jumystary der kezinde aıaqtaldy. Qıyn-qystaý sátte qoldaý bildirip, arystyqtarǵa demeý bolǵan №5 sektordyń ókilderi 11 kópqabatty úıdiń 519 páterine jáne 72 jeke turǵyn úıge jóndeý jumystaryn júrgizdi. Al, Atyraý oblysy men Jetisaı aýdanyna qarasty №1-sektordyń aýmaǵy jarylys bolǵan áskerı bólimniń janynda ornalasqan. Kóktem shaǵyn aýdanynda ornalasqan aýmaqta 571 úıdiń 468-i jóndeýden ótti. Onyń ishinde 55 úı qaıta turǵyzylyp, 11 kásipkerlik nysan jóndelgen. Qurylysty barlyǵy 13 merdiger kompanııa júrgizdi. Jalpy qurylysqa 700-ge jýyq qurylysshy men 12 tehnıka jumyldyrylǵan.
Eske salaıyq, Arys qalasyndaǵy zaqymdanǵan 7613 úıdiń 7166-synda jóndeý jumystary júrse, 447 úı qaıta salyndy.
