Arys qalasyn qalpyna keltirýge 34,5 mlrd teńge baǵyttalady

NUR-SULTAN. QazAqparat - Bul týraly Premer-Mınıstrdiń Birinshi orynbasary - QR qarjy mınıstri Álıhan Smaıylov QR Parlament Senatynda málim etti, dep habarlaıdy QazAqparat primeminister.kz silteme jasap. 

Aldyn-ala esepteýler boıynsha, a.j. 1 shildede Arys qalasyn qalpyna keltirý úshin 34,5 mlrd  teńgege jýyq qarajat qajet, onyń ishinde Arys qalasynyń ár turǵynyna 100 myń teńgeden ótemaqy berý úshin 4,5 mlrd teńge qarastyrylǵan. 

Á. Smaıylov atap ótkendeı, osy maqsattarda QR Úkimetiniń qorynan 2 mlrd teńge, Túrkistan oblysynyń bıýdjetinen 1 mlrd teńge, gýmanıtarlyq kómek retinde 1,5 mlrd teńge bólingen.

«7 709 turǵyn úıdi qalpyna keltirý qajet, onyń ishinde 49 úı bútindeı qırap qalǵan. Turǵyn úılerdi qalpyna keltirý úshin 19,2 mlrd teńge bólinedi, onyń ishinde qarajattyń 50%-yn óńirlerdiń bıýdjeti esebinen qamtamasyz etý kózdelgen,  50% - QR Úkimetiniń qorynan baǵyttalady», - dedi Á. Smaıylov.

Arys qalasyndaǵy 66 áleýmettik nysandy qalpyna keltirý úshin (54 bilim berý nysany, 8 densaýlyq saqtaý nysany, 4 sport nysany) 7 mlrd teńge baǵyttaý josparlanǵan, onyń ishinde 6 mlrd teńge «Samuryq-Qazyna» UÁQ esebinen, al 1 mlrd teńge - elimizdiń bıznes qaýymdastyǵy esebinen baǵyttalady. 

Á. Smaıylov elektr jelilerin, jylýmen qamtýdy qalpyna keltirý jáne ınfraqurylymdy jóndeý úshin 2,2 mlrd teńge bólinetinin aıtty.

«34 ákimshilik ǵımaratty jóndeý úshin 1,7 mlrd teńge baǵyttalady. Bul maqsattarǵa qarjyny QR Úkimetiniń qorynan bólý kózdelgen», - dedi mınıstr.