Arys qalasy mańynan «Qazarsenal» JShS-niń oq-dárilerdi zalalsyzdandyrý orny áli kúnge kóshirilmeı otyr
ASTANA. Maýsymnyń 10-y. QazAqparat /Qanat Mámetqazyuly/ - Arys qalasy turǵyndarynyń qaýipsizdigin saqtaý maqsatynda «Qazarsenal» JShS-niń oq-dárilerdi zalalsyzdandyrý ornyn qaladan tys jerge kóshirý qajet. Búgin QR Parlamenti Senatynyń jalpy otyrysynda Úkimet basshysynyń atyna saýal joldaǵan senator Qýanysh Aıtahanov osylaı málim etti.
Depýtat óziniń saýalynda 2009 jyly naýryzdyń 20-synda Ońtústik Qazaqstan oblysy Arys qalasynyń mańyndaǵy áskerı garnızonda «Qazarsenal» mekemesiniń oq-dári qoımasynda jarylys bolyp, bes adam qaza tapqanyn, onshaqty adam jaralanǵanyn eske saldy. Osy másele tóńireginde Arys qalalyq máslıhat depýtattary alańdaýshylyq tanytyp, hat ta joldaǵan eken.
«Ol hatta: «Arys qalasynyń mańyndaǵy jarylystan keıin Arys qalalyq máslıhatynyń kezekten tys sessııasynda «Qazarsenal» JShS mekemesiniń basshylary shaqyrylyp qala turǵyndarynyń talaptaryna sáıkes, olardyń qaýipsizdigin saqtaý maqsatynda, oq-dárilerdi zalalsyzdandyrý ornyn qaladan tys jerge kóshirý týraly usynys-talap qoıylǵan bolatyn. Bul týraly buqaralyq aqparat quraldary da birneshe ret másele kóterdi. Alaıda, osy kúnge deıin atalǵan mekeme kóshirilgen joq, kerisinshe jumysyn jandandyra túsýde. Osy máseleniń oń sheshilgeni ıgi» - dep kórsetilgen. Osyǵan baılanysty Úkimet basshysynan Ońtústik Qazaqstan oblysy Arys qalasy turǵyndarynyń qaýipsizdigin saqtaý maqsatynda «Qazarsenal» JShS-niń oq-dárilerdi zalalsyzdandyrý ornyn qaladan tys jerge kóshirýge yqpal etýin suraımyn», dedi senator.
