Arys, biz birgemiz: Kásipodaqtar federatsııasy úndeý jarııalady
Qazaqstan Kásipodaqtar federatsııasy búkil elge úndeý tastady.
«Arys qalasyndaǵy tehnogendik tótenshe oqıǵa týraly aqparatty qulazyǵan kóńilmen qabyldap, asa aýyr qıyndyqqa tap bolǵan qala turǵyndary men áskerı qyzmetshilerdiń ómiri men densaýlyǵyna úlken alańdaýshylyq bildiremiz. Apattyń aıtyp kelmeıtini - aqıqat! Sondyqtan osy qıyndyqta biz, barsha qazaqstandyqtar, bir jaǵadan bas, bir jeńnen qol shyǵara otyryp, birlikti tý etken el ekenimizdi dáleldeýge tıispiz. «Kúsh - birlikte» degendeı, el basyna túsken bul aýyr jaǵdaı qabyrǵamyzdy qaıystyrsa da, erik-jigerimizdi jasytyp, saǵymyzdy syndyrmaýy tıis», - delingen úndeý mátininde.
Kásipodaq ujymynyń atynan jarııalanǵan qujatta árbir Arys turǵynynyń basyna túsken qıyndyq barsha Qazaqstandyqqa ortaq ekeni aıtylǵan.
«Elimiz ortaq, jerimiz ortaq, ıaǵnı, arystyq baýyrlarymyzdyń basyna túsken bul aýyr jaǵdaı da bərimizge ortaq. Endeshe barlyǵymyz azamattyq pen adamgershilik tanyta otyryp, ortaq apattan tys qalmaı, qolymyzdan kelgenshe zardap shekken baýyrlarymyzǵa jan-jaqty materıaldyq, áleýmettik jáne psıhologııalyq kómek kórseteıik. Qazir kásipodaqtar federatsııasynyń aýmaqtyq birlestikteri zardap shekkenderge kómek kórsetý maqsatynda respýblıkamyzdyń barlyq aımaqtarynda arnaıy uıymdastyrý is-sharalaryn shuǵyl bastap ketti. Osy oraıda biz respýblıkamyzdyń barlyq kásipodaq múshelerin, jumys berýshiler men bıznes ókilderin kómek kórsetý jumystaryn qolǵa alǵan Kəsipodaqtar federatsııasynyń Aýmaqtyq birlestikteri tóraǵalarynyń janyna toptasyp, ıgilikti isti birlese atqarýǵa shaqyramyz», - delingen Úndeýde.
Al «Memlekettik-jeke menshik áriptestikti damytý ortalyǵy» AQ ujymy Arystaǵy jurtqa kómek retinde bir kúndik eńbekaqysyn aýdaratyndaryn habarlady.
«MJÁ damytý ortalyǵynyń ujymy Arys qalasynyń turǵyndaryna kómek retinde bir kúndik jalaqysyn aýdarýǵa sheshim qabyldady. Bul árkimniń erikti sheshimi. Bizdiń árqaısymyz qaıǵyly oqıǵada zardap shekkenderge kómek qolyn sozýǵa daıyn bolýymyz kerek», - delingen habarlamada.
Sondaı-aq,Tuńǵysh Prezıdent qory Arys turǵyndaryna materıaldyq kómek jasap, qarajat aýdarýda.
