Arys aýdanynda ınkassatorlardy óltirý oqıǵasyna qatysty taǵy bir kúdikti ustaldy
ARYS. QazAqparat - Túrkistan oblysy, Arys aýdanynda ınkassatorlardy óltirý qylmysy boıynsha taǵy bir kúdikti ustaldy. Bul týraly oblystyq PD baspasóz qyzmeti málimet taratty, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, ustalǵan kúdikti ınkassatorlardy óltirgen turǵynnyń tanysy bolǵan. Óz áriptesterin óltirgen «Qazposhta» qyzmetkeri qylmysyn jasaǵan soń, osy tanysynyń qorasyna ańshy qarýy men aqshalardy ákelip tyqqan. Al, qamaýǵa alynǵan kúdikti tanysynyń adamdardy óltirgenin jáne aıǵaqty zattaryn qorasyna tyqqanyn polıtsııaǵa aıtpaı, jasyrýǵa tyrysqan. Osy úshin ol endi qamaýǵa alyndy.
«Seziktige qatysty Qylmystyq kodekstiń 434 baby «Qylmys týraly habarlamaý» jáne 287 baby «Qarýdy, oq-dárilerdi, jarylǵysh zattardy jáne jarylatyn qurylǵylardy zańsyz ıemdený, berý, ótkizý, saqtaý, tasymaldaý nemese alyp júrý» boıynsha is qozǵalyp, sotqa deıingi tergeý amaldary júrgizilýde» delingen habarlamada.
Sondaı-aq, polıtsııanyń habarlaýynsha buǵan deıin ınkassatorlardy óltirgen dep kúdiktelgen «Qazposhta» qyzmetkerine qatysty taǵy bir qylmystyq is qozǵaldy. Ol buǵan deıin Qylmystyq kodekstiń eki babymen, «Adam óltirý» jáne «Qaraqshylyq» boıynsha tergeýge alynsa, endi oǵan qatysty 287 bab «Qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý» boıynsha is qozǵalǵan.
Eske salaıyq, 7 maýsym kúni Arys qalasy mańynda belgisiz bireýler ınkassatorlardy óltirip, qyzmettik kólikterinen 7,5 mln teńgesin tonap ketken bolatyn. Keıinnen bul qylmysty eńbek demalysynda júrgen «Qazposhta» qyzmetkeri jasaǵany anyqtaldy. Ol ózimen birge jumys isteıtin ınkassator áriptesteriniń senimine kirip, shalǵaı aýylǵa jetkizip salýlaryn suranǵan. Sóıtip qyzmettik kólikke minip, áriptesterin óltirgen. Qazirgi tańda ol qamaýǵa alynyp, sotqa deıingi tergeý amaldary júrgizilýde.
