Arys aýdanynda ınkassatorlardy óltirgen poshta qyzmetkeri bolyp shyqty
ARYS. QazAqparat - Túrkistan oblysy, Arys aýdanynda ınkassatorlardy qasaqana óltirgen eńbek demalysynda júrgen poshta qyzmetkeri bolyp shyqty, dep habarlaıdy QazAqparat tilshisi.
Búgin oblystyq Polıtsııa departamentiniń bastyǵy, general-maıory Qaırat Dálbekov kólikti tonap, qyzmetkerlerdi aıaýsyz óltirgen kúdiktiniń ustalǵandyǵyn málim etti.
Qaırat Dálbekovtyń aıtýynsha, qaskóılerdiń qolynan qaza tapqan eki ınkassator qyzmettik kólikpen Zadarııa men Montaıtas aýyldarynda bolyp, odan soń poshtamen birge Qojatoǵaı eldi mekenine bara jatqanda kúndizgi saǵat 12-lerden keıin baılanyssyz ketken.
«Eki ınkassatorymen birge iz-tússiz joǵalyp ketken qyzmettik kóliktiń ishinde aýyl turǵyndarynyń zeınetaqysy men járdemaqysyn tóleýge arnalǵan 7,5 mıllıon teńgeden astam qarjy bolǵan. Kúdiktilerdiń meken-jaıyn anyqtaý maqsatynda, barlyq is-sharalar atqaryldy. Túrkistan oblysy Polıtsııa departamenti men Arys APB-niń arnaıy kásibı mamandardan jedel-tergeý toby quryldy. Olar iz-tússiz joǵalǵan ınkassatorlardy arnaıy izdep, barlyq aýdan ortalyǵyna shyǵar jerlerdi, aımaqtardy, kósheler men qıylystarǵa qoıylǵan beınekameralardy tekserdi. Kýágerlerden suraq-jaýaptar alyp, qajetti degen sharalardy atqardy»,- dedi oblystyq Polıtsııa departamentiniń bastyǵy.
Qaırat Dálbekovtiń sózinshe, óńirdiń jedel ýákilderi sol kúni saǵat shamamen 20:00-den asqanda Arys qalasynan 3 shaqyrym jerden kólikti tapqan. Ony tekserý barysynda qan izderi alynyp, ınkassatorlardyń qasaqana óltirilgeni belgili bolǵan. Al, kelesi kúni tańǵy saǵat 6:00-de aýdan ortalyǵynan 35 shaqyrym jerden bastaryna oq tıgen ınkassatorlardyń máıiti tabylǵan.
«Jedel-izdestirý sharalaryn júrgizip, kúdiktiniń tulǵasyn anyqtadyq, sondaı-aq ony turǵylyqty mekenjaıynda ustadyq. Kúdikti azamat poshta bólimshesiniń qyzmetkeri, 1981 jylǵy jergilikti turǵyn bolyp shyqty. Ustalǵan azamattan ańshy myltyǵy pen urlanǵan aqshalar tabylyp, tárkilendi. Kúdiktiniń aıtýyna qaraǵanda, ol eńbek demalysynda júrip, áriptesterimen birge barar jerine jetkizýdi suranǵan. Sodan keıin avtokólik ishinde otyryp, eki áriptesin atyp, aqshany alyp, boı tasalaǵan. Er azamat QR Qylmystyq kodeksiniń eki babymen, ıaǵnı 99-baby «Adam óltirý» jáne 192-baby «Qaraqshylyq» boıynsha qylmysty jasaǵan degen kúdikpen ustalyp, qamaýǵa alyndy. Oqıǵanyń tolyq mán-jaıy sotqa deıingi tergeý barysynda anyqtalady»,- dedi general-maıor.
Eske salaıyq, 7 maýsym kúni Arys qalasy mańynda belgisiz bireýler ınkassatorlardy óltirip, qyzmettik kólikterinen 7,5 mln teńgesin tonap ketken bolatyn.
