Aryq jelilerin tazartý: Almaty kóshelerinen 4,5 tonna qoqys shyǵaryldy

ALMATY. QazAqparat - Almatyda sý basýdyń aldyn alý jáne joıý úshin aryq jelileri men aryq ótkelderin tazartý jumystary júrgizildi, dep habarlaıdy QazAqparat tilshisi.

Almaty qalasy ákimdiginen habarlaǵandaı, jumysqa 650 jol jumysshysy, 266 birlik arnaıy tehnıka jáne 24 motopompa jumyldyryldy, qum salynǵan 2000 qap daıyndaldy.

Jumys nátıjesi boıynsha 4,5 tonna qoqys pen tunba qala syrtyna shyǵaryldy.

Naýryz aıynda bastalǵan jańbyr kezinde aryqtarǵa turmystyq qoqystyń jınalýy, ótkizý qabiletiniń tómendigi, dıametrleriniń azdyǵy, jerasty aryq ótkelderiniń aqaýlary, jol tóseminiń opyrylýy saldarynan aryqtardan nóser sýynyń tasý jaǵdaılary tirkeldi.

Al qalalyq TJD málimetinshe, 18 naýryzda, saǵat 18:00-degi jaǵdaı boıynsha 23 sý tasqyny jaǵdaıy tirkeldi: olardyń 8-i rastalmady, 7-ýi joıyldy, qalǵan 8 ýchaske boıynsha jumystar jalǵasýda.