Arýjan Saın Túrkistan oblysynda tárbıeshiniń jetkinshekterdi soqqyǵa jyǵýyna qatysty túsinikteme berdi

NUR-SULTAN. QazAqparat - Túrkistan oblysyndaǵy jazǵy lagerde tárbıeshiniń jetkinshekterdi soqqyǵa jyǵý faktisine qatysty jańa derekter shyqty, dep habarlaıdy QazAqparat tilshisi.

«15 tamyz kúni joǵaryda atalǵan balalar sýǵa túsip shyqqannan keıin 2001 jyly dúnıege kelgen tárbıeshi sýǵa túsip jatqan dýshty syǵalap qaraǵan. Baıqap qalǵan tárbıeshi ashýlanyp, olardy uryp, tepken. Bul oqıǵany balalardyń biri vıdeoǵa túsirip, WhatsApp qosymshasy arqyly topqa jibergen», - dep jazdy Bala quqyqtary jónindegi ýákil Arýjan Saın Facebook-tegi paraqshasynda.

Onyń sózine qaraǵanda, toptyń belgisiz qatysýshysy vıdeony ata-analarǵa jibergen.

«Kámeletke tolmaǵandar faktini joqqa shyǵaryp otyr. Demalýshylardyń ata-analary shaqyryldy. Syrttaı qaraǵanda kámeletke tolmaǵandarda kózge túsetin zaqym joq. Sot-medıtsınalyq saraptama taǵaıyndaldy. Atalǵan fakti Tóle bı aýdandyq polıtsııa bóliminiń aqparattardy tirkeý kitabynda tirkelgen, tekserý júrip jatyr», - dedi ol.

A.Saın aqparatty Túrkistan oblysy ákiminiń keńesshisi Sáken Qalqamanovtyń bergendigin atap ótedi.

Buǵan deıin«Suńqar» demalys ornynda balalardy soqqyǵa shyqqan tárbıeshiniń ústinen qylmystyq is qozǵalǵanyn habarlaǵan edik.