Arýjan Saın pedofıl qurbandaryn jarııalaǵandardy jaýapqa tartýǵa shaqyrdy
ALMATY. QazAqparat - «Meıirimdilik» Erikti qoǵamy» Qoǵamdyq qorynyń jetekshisi Arýjan Saın quqyq qorǵaý organdarynan «#NeMolchı/ Únsiz qalma» qoǵamdyq qozǵalysy basshylaryn jaýapkershilikke tartýdy surady, dep habarlaıdy «QazAqparat».
Qozǵalysty teksertýge №1 balalar úıindegi jynystyq zorlyq kórgender týraly aqparattyń jarııa bolýy sebep boldy.
Arýjan Saınnyń aıtýynsha, jaqynda qoǵamdyq qozǵalystyń Facebook paraqshasynda jasóspirim týraly aqparat jaryq kórip, bolǵan oqıǵa jaıly egjeı-tegjeıli jazylǵan.
«Olar aty-jónderin, olardyń balalardy qalaı zorlaǵanyn taratty. Balalar pikirler men hattardy oqıdy. Bul balalar quqyǵyn buzý. Ol qysymǵa shydaı almaı, áleýmettik jelilerge óz pikirin jazdy. Al eger erteń ózine qol salsa she? Ary qaraı qalaı ómir súredi, kim osyny jasap otyrǵan? Ózin kimbiz dep oılaıdy olar? Bul neǵylǵan qoǵamdyq qozǵalys. Quqyq qorǵaý organdary pedofılderdiń qurbany bolǵan balalardyń quqyǵyn buzǵandardyń áreketterin qadaǵalaýy qajet dep esepteımin. Olardyń áreketterin qadaǵalap qana qoımaı, jaýapqa tartý kerek», - dedi Arýjan Saın.
Qoǵam qaıratkeri óz sózinde balalar úıi men ınternattardaǵy balalardy qorǵaý úshin qoǵamdyq qadaǵalaý júıesin engizý qajettigin aıtty.
Onyń sózinshe, eger eriktiler balalar mekemelerine kirýge ruqsat alsa, onda eshqandaıda zorlyq kórsetilmeıdi.
«Qoǵamdyq qadaǵalaý men jarııalylyq qana, sondaı aq beınebaqylaý ǵana balalar úıiniń tárbıelenýshilerin qorǵaı alady. Ókinishtisi, №1 balalar úıinde beınebaqylaý júrgizilmegen», - dedi Saın.
Eske sala keteıik, 26 jeltoqsan kúni №1 balalar úıindegi zorlyqqa qatysty sot úkimi shyqty. Aıyptalýshyǵa qatysty 15 jylǵa qatań rejimdegi kolonııada jazasyn ótýge úkimi shyǵaryldy. Sonymen qatar, balalar úıiniń burynǵy dırektory G.Shýnaeva men onyń advokaty Gúlnar Muratqa qatysty jeke qaýly shyqty.
«Sottalǵan jigitti biz kóp jazǵyrmaımyz. Sebebi, onyń ózi de ınternat tárbıelenýshisi bolǵan. Onyń ózi sondaıdy kórip ósken bolýy múmkin. Adamgershiligi mol adam bolyp ósetindeı oǵan jaǵdaı jasalmady. Balalar úıindegi júıede balalarǵa kóńil bólinbeıdi, ata-ana mahabbaty berilmeıdi», - dedi sózin qorytyndylaǵan Arýjan Saın.
