Arýjan Saın ógeı ákesinen taıaq jep, aýyr halde jatqan balanyń isin qolǵa aldy
ALMATY. QazAqparat – QR Balalar quqyǵy jónindegi ýákil Arýjan Saın Almatyda bolǵan jantúrshigerlik oqıǵa týraly túsinik berdi, dep habarlaıdy QazAqparat tilshisi.
«Bul sumdyq. Bala aýrýhanada jatyr. Dárigerler oǵan qoldan kelgen kómekti jasap jatyr. Qazir qalalyq bilim basqarmasymen baılanysta otyrmyz. Qorǵanshylyq jáne qamqorlyq mekemelerinen otbasy týraly, anasy týraly aqparat surattym. Bul otbasynda 5 jastaǵy taǵy bir bala bar. Eger bala buryn da zardap shekken bolsa, anasy nege dabyl qaǵyp, balasyn qorǵamady eken? Ekinshi balanyń jaǵdaıy qalaı? Suraq kóp. Bul jerde tek ákesiniń ǵana emes, anasynyń da jaýapkershiligi qanshalyqty bolǵanyn túsinip alý kerek. Eger ol balalarǵa qol kóterýge ruqsat berse, onyń da jaýapkershiligin qarastyrý kerek», - dedi Arýjan Saın.
Ýákiletti tulǵa qajet bolǵan jaǵdaıda balaǵa kómek kórsetetinin aıtty.
«Eger balaǵa sheteldik mamandardyń kómegi kerek bolsa, bizdiń qor ony qamtamasyz etýge daıyn», - dedi spıker.
Aıta ketý kerek, jantúrshigerlik oqıǵa týraly keshe habarlaǵan bolatynbyz. 2 jasar búldirshindi ógeı ákesi uryp tastaǵan. Alǵan jaraqaty aýyr bolǵandyqtan bala komaǵa túsip qaldy.
