Arýjan Saın qosymsha úıirmeler ashýǵa qatysty usynys aıtty
ASTANA. QazAqparat – Mektepterde úıirmeler ashý máselesine erekshe mán berý kerek. Bul týraly elimizdegi bala quqyqtary jónindegi ýákil Arýjan Saın málim etti, dep habarlaıdy QazAqparat tilshisi.
«Balalar máselesine qatysty vedomstvolar arasyndaǵy ózara is-qımyl tıisti deńgeıde atqarylmaı otyr. Bul turǵyda ár vedomstvo óz baǵytyndaǵy josparyn iske asyryp jatyr jáne birlesip sheshetin máselelerge mán bermeıdi. Sonyń saldarynan memleket úshin, sondaı-aq balalar jáne otbasylarǵa qatysty tıisti nátıje bolmaı jatyr. Sektsııalar men úıirmeler qurý bóliginde mektepterdiń áleýetin paıdalaný máselesine toqtalsaq, jaýapty mınıstrlikpen birge birneshe jıyn ótkizgen edik. Osy oraıda jan basyna qaraı qarjylandyrý aıasynda mektepterde qalaısha úıirmeler ashýǵa bolatyny jaıynda tanystyrylymdar jasadyq. Degenmen, mektepter jumys istegisi keletin sektsııalarmen jáne úıirmelermen tıisti shartty bekitkisi kelmeı otyr», - dedi A. Saın elimizdegi jasóspirimder máselesi boıynsha onlaın rejımde ótken jıynda.
Onyń aıtýynsha, balalardyń ýaqytyn bosqa ótkizýge bolmaıdy. Únemi kóshede júretin nemese ınternette otyratyn balalalar arasynda qylmys kóbeıedi.
«Árıne, úsh aýysymdaǵy mektepterdiń sport zaldary bos bolmaıdy. Sondyqtan shyǵarmashylyq baǵyttaǵy úıirmelerge mektep ǵımaratynyń bir bóligin jalǵa berýin qarastyrýǵa bolady. Jazǵy demalys kezinde de balalar ýaqytyn bos ótkizip jatady, mektepter jabyq turady. Atap aıtqanda, osy máselege qatysty vedomstvolar arasyndaǵy ózara is-qımyldy retke keltirý kerek. Al óńirlerde jergilikti atqarýshy organdar deńgeıinde áreketsizdik bolsa, onda tıisti jaýapkershilikti qarastyrǵan jón. Sebebi osy kemshilikter saldarynan bizdiń balalar zardap shegip otyr», - Arýjan Saın.
Budan buryn habarlanǵandaı, elimizdegi bala quqyqtary jónindegi ýákil Artsport baǵdarlamasy iske qosylǵan kezden bastap jasóspirimder men balalar qylmysy tómendeı bastaǵanyn aıtty.
