Arýjan Saın: «Aýtızmdi jeńemiz» jobasyna júginetinder sany 3 ese ósti
Sarapshylardyń aıtýynsha, álemde aýtızm dıagnozymen dúnıege keletin balalardyń sany kóbeıgen. Qazaqstandyqtardy da bul dert aınalyp ótpedi. Máselen, 2009 jyly 110 balanyń bireýi ǵana aýtızmmen aýyratyn. "Meıirim Eriktiler qoǵamy" qorynyń málimeti boıynsha, búginde elimizde 60 myńnan astam adam aýtızm dıagnozymen ómir súrip jatyr.
«Aýtızmdi jeńemiz» jobasyn bastaǵanda ǵımaratty jalǵa alýǵa týra keldi. Keıinnen jomart jandar osy úıdi syılady. Bir jyldyń ishinde ata-analar men balalardy aýtızmmen kúresýge úıretetin arnaıy ortalyqqa aınaldyq. Aýtızm bul - úkim emes, bul dıagnozben ómir súrýdi úırenemiz ári ózgelerge úıretemiz. Balalaryn bizdiń ortalyqqa tapsyrǵysy kelmeıtin ata-analar bar. Alaıda bizdiń qoǵamda aýtıst balalalar ózdigimen damı almaıdy», - deıdi "Meıirim Eriktiler qoǵamy" qorynyń dırektory Arýjan Saın.
Qoǵam belsendisiniń aıtýynsha, Qazaqstanda aýtızmmen aýyratyndardyń naqty esebi joq. Keıbir ata-analar tipti memlekettik oryndarǵa tıisti qujattardy tapsyrmaı, kómekke júginbeıtin kórinedi.
«Buǵan deıin aýtızmmen aýyratyndarǵa durys dıagnoz qoıylmaı kelgen jaǵdaılar boldy. Ony dárigerler psıhıkalyq aýytqý dep shatastyryp júrdi. Biraq aýtızmmen aýyratyn adamdar psıhologııalyq kómekke muqtaj jáne ony birinshi kezekte jaqyndarynan kútedi. Bizdiń ortalyqta balalarmen tikeleı ata-anasy aınalysady. Bastysy - bári tegin. Bizge Reseıden, Belarýsten jáne Qazaqstannyń túrli aımaqtarynan keletinder bar. Keıbir balalardan aýtızmniń kúrdeli túri tabylyp jatady. Sondyqtan ata-analardy balalarynyń damýyna, minez-qulqyna muqııat bolýǵa shaqyramyz. Dıagnozdy barynsha erte anyqtasaq, balany emdep, úıretýge múmkindik bolady», - dedi Arýjan Saın.
Sondaı-aq qor músheleri atap ótkendeı, bul aýrýdy emdeýdegi eń basty kedergi - mamandardyń jetispeýi, ońaltý ortalyqtarynyń bolmaýy jáne dári-dármektiń qymbatshylyǵy.
«Atalǵan máselelerdi sheshý úshin qor janynan «Ashyq júrek» qaıyrymdylyq bastamasyn qolǵa aldyq. Jomart jandardyń járdeminiń arqasynda ótken jyly aýtıst balalarǵa 700 mln dollar qarajat jınaldy» deıdi qor ókilderi.
Eske sala ketsek, "Meıirim Eriktiler qoǵamy" qory «Balalarǵa ómir syıla» jobasy aıasynda elimizdegi emdelmeıtin dertke shaldyqqan balalarǵa kómek kórsetedi.
