Arýjan Saǵyndyqova Mysyrdaǵy jarystyń shırek fınalyna joldama aldy
ASTANA. KAZINFORM — Qazaqstandyq tennısshi, álemniń 765-raketkasy, 21 jastaǵy Arýjan Saǵyndyqova Sharm-esh-Sheıh (Mysyr) ITF W35 týrnırinde eki jeńiske qol jetkizdi.
Qazaqstandyq tennısshi aldymen reıtıngide 1 425-oryndaǵy reseılik Aglaıa Fedorovany 6:0, 0:6, 6:4 esebimen joldan taıdyrdy.
Arýjannyń ekinshi aınalymdaǵy qarsylasy áldeqaıda azýly boldy. Bul joly ol álemniń 386-ynshy, osy jarystyń 4-raketkasy, úndistandyq Sahaıa ıAmalapallıge tap keldi.
Eki saǵat 8 mınýtqa sozylǵan tartysty básekede A.Saǵyndyqova 6:4, 7:6 (7:4) esebimen basymdylyq tanytty.
Arýjan Saǵyndyqova jartylaı fınalǵa shyǵý úshin álemniń 405-raketkasy, mysyrlyq Abdel Azız Lamıs Alhýsseınmen talasady.
Qazaqstandyq tennısshi juptyq synda reseılik Marııa Golovınamen birge alǵashqy aınalymda ıtalııalyqtar Federıka Sakko – Kamılla Zanolınıge jol berdi – 6:3, 3:6, 7:10.
Eske sala keteıik, budan buryn Tımofeı Skatovtyń Shymkent týrnıriniń fınalyna shyǵý úshin talasatynyn jazǵan bolatynbyz.
Sondaı-aq Denıs Evseev juptyq synda Shymkent týrnıriniń jartylaı fınalyna shyqty.
