Artyq tólemdi azaıtatyn bastama
ASTANA. QazAqparat - Ulttyq ekonomıka vıtse-mınıstri Qaıyrbek Óskenbaev 2015 jyldyń 1 qańtarynan bastap kólik quralyn júrgizýge senimhattyń jáne shyqqanyna 7 jyldan aspaǵan kólikterdi tehnıkalyq baıqaýdan ótkizýdiń joıylýy múmkindigi jóninde málimdegen bolatyn. Óte durys qadam.
Alaıda, bul jańalyq depýtattar arasynda pikirtalas týǵyzdy. Máselen, Májilis depýtaty Merýert Qazbekova: «Bul jappaı tártipsizdikke, qylmystyń kóbeıýine ákep soǵady. El arasynda kóptegen túsinispeýshilikter týǵyzady. Munyń ne qajeti bar?» degen ýáj aıtqan bolatyn. Mundaı tájirıbe álemniń kóptegen elderinde bar. Tipti, Reseı men Qyrǵyz elinde atalmysh qujat áldeqashan kúshin joıǵan. Bul birinshiden, halyqtan qajetsiz, artyq tólemder jınaýdy azaıtady. Tehnıkalyq baıqaý elimizde bıznes kózine aınalǵan. Onyń avtokóliktiń durys júrýine tipti de áseri joq. Al, kólik júrgizýge senimhat berý degen notarıýstardyń tabys kózi.
Sonymen qatar, Jol polıtsııasy qyzmetkerleriniń atalmysh qujattar tóńireginen sál kiltıpan tapsa, júrgizýshiniń qaltasyn qaǵatyny taǵy bar. Ulttyq ekonomıka mınıstrliginiń usynysy oryndalsa, elimizde biraz jemqorlyq pen jeńushynan jalǵasýshylyqtyń tetikteri joıylar edi. Tehnıkalyq tekseristiń tek formaldy qujat ekenin kópshiliktiń bári biledi. Senimhattyń da qazirgi tańda ózektiligi joıylǵan. Sondyqtan bul sheshim eki másele úshin de tıimdi tásil sekildi. Budan halyq utpasa, utylmasy haq. Taǵy bir aıta ketetin jaıt, senimhat joıylǵanda, seniń kóligińdi kim bolsa, sol aıdap kete beredi degen sóz emes. Avtokóliktiń saqtandyrý polısine aty-jóni jazylǵan tulǵalar ǵana ony basqarýǵa quqyly bolady.
ıAǵnı, Merýert Qazbekova sekildi qalaýlylardyń alańdaýyna esh negiz joq.
