Artyq salmaq jınaǵan aqtóbelikterge Lıtva dárigeri ota jasady
AQTÓBE. QazAqparat - Aqtóbe medıtsınalyq ortalyǵynyń dárigerleri artyq salmaq qosqan adamdarǵa ota jasaý tehnologııasyn meńgerip jatyr. Sheberlik sabaǵyn Lıtvanyń Kaýnas qalasynan kelgen hırýrg ótkizdi, dep habarlaıdy QazAqparat tilshisi.
Aqtóbede medıtsınalyq klasterdi damytý maqsatynda álemniń jetekshi elderinen dárigerler kelip, tájirıbe sabaǵyn ótkizip jatyr. Bul joly Aqtóbege Lıtvadan hırýrg Almantas Malıaskas keldi. Ol Kaýnas qalasyndaǵy ýnıversıtet emhanasynda jumys isteıdi. Aqtóbege jumys sapary kezinde tórtinshi deńgeıli artyq salmaq jınaǵan 7 adamǵa ota jasady. Ota laparoskopııalyq ádispen jasalyp, aqtóbelik dárigerler tájirıbe jınady. Barlyq operatsııa onlaın rejimde kórsetilip, medıtsınalyq ortalyq dárigerleri konferents-zaldan qarap otyrdy. Professor Almantas Malıaskastyń aıtýynsha, artyq salmaqtan arylýǵa arnalǵan otanyń bul túri keń taralǵan.
«Ota kezinde asqazannyń kólemi kishireıtilip, negizgi qalpyna keltiriledi. Mundaı otadan soń adam óz salmaǵyn turaqty ustap tura alady. Sonymen qatar, boıǵa jınalǵan artyq salmaqtyń 75 paıyzynan arylýǵa bolady»,- dedi professor Almantas Malıaskas.
Aıta keteıik, Lıtva dárigeri artyq salmaqqa dýshar bolǵan 5 balany qabyldap, keńes berdi. Hırýrg kúzde taǵy kelip, birneshe ota jasap, aqtóbelik dárigerler tájirıbe jınaıdy. Al Aqtóbe medıtsınalyq klasterin damytý maqsatynda baýyr, búırek aýystyrý otasy Ońtústik Koreıa dárigerleriniń kómegimen jasaldy. Sonymen qatar, Reseı dárigerleri de óz tájirıbelerimen bólisedi. Eýropanyń jetekshi elderinen tájirıbe jınaý jumysy ári qaraı jalǵasady.
