Ártúrli kóliktiń tehnologııalyq birtutastyǵyn qamtamasyz etetin ortalyqtar qurý qajet - depýtat

ASTANA. KAZINFORM – Ártúrli kólik túrleriniń tehnologııalyq birtutastyǵyn qamtamasyz etetin kólik-logıstıka ortalyqtaryn qurý qajet. Bul týraly Májilistegi eldiń kólik-logıstıkalyq áleýetin damytýǵa arnalǵan Úkimet saǵatynda depýtat Nurtaı Sabılıanov aıtty.

- Tasymaldardy konteınerler arqyly júzege asyrýdyń álemdik ósý úrdisin eskere otyryp, konteınerlik, mýltımodaldyq tasymaldardy jan-jaqty damytyp, ártúrli kólik túrleriniń tehnologııalyq birtutastyǵyn qamtamasyz etetin kólik-logıstıka ortalyqtaryn qurý qajet. Ózderińizge belgili, Parlament bıyl Qazaqstan men Qytaı Halyq Respýblıkasy arasyndaǵy Transkaspıı halyqaralyq kólik baǵytyn, onyń ishinde Qytaı-Eýropa qatynasyndaǵy konteınerlik poıyzdar úshin damytý jónindegi kelisimderdi qabyldady. Osy kelisimder eki eldiń aýmaǵy boıynsha konteınerlik poıyzdar úshin eksporttyq-ımporttyq, tranzıttik tasymaldardy ulǵaıtýǵa baǵyttalǵan, - dedi ol.

Májilis depýtaty osyǵan baılanysty Úkimet Transkaspıı halyqaralyq kólik baǵytynyń búkil uzyndyǵy boıynsha ýchaskelerdiń ótkizý qabiletin arttyrý jónindegi is-sharalardyń ýaqtyly iske asyrylýyn baqylaýǵa alýy qajet dep sanaıtyndyǵyn basa aıtty.

- Prezıdenttiń tapsyrmasy boıynsha 4 iri temirjol jobasy iske asyrylýda. Olar: «Dostyq – Moıynty», «Baqty – Aıagóz», «Darbaza – Maqtaaral» jáne Almaty qalasyn aınalyp ótetin temirjol jelisi. Búgingi tańda 3 joba boıynsha belgilengen merzimde jumystar júrgizilýde. Alaıda, uzyndyǵy 297 shaqyrym bolatyn mańyzdy ınfraqurylymdyq temirjol jobasynyń biri - «Baqty – Aıagóz» jobasynyń qurylysy óte baıaý. Onda geologııalyq jumystardy bastaýǵa daıyndyq qana júrgizilýde. Bul jobanyń mańyzy óte zor, óıtkeni ol Qytaı men Qazaqstan arasyndaǵy ótkizý qabiletin qosymsha 20 mln tonnaǵa arttyrýǵa múmkindik beredi. Sondyqtan osy jobanyń qurylys qarqynyn jedeldetip, ony belgilengen merzimde aıaqtaý jóninde sharalar qabyldaý qajet, - dedi Nurtaı Sabılıanov.