Ártúrli el men mádenıet ókilderi arasyndaǵy dostyq baılanys qaqtyǵystardyń aldyn alady — Prezıdent
ASTANA. KAZINFORM — Ártúrli el men mádenıet ókilderiniń arasyndaǵy dostyq baılanys qaqtyǵystar men soǵystardyń aldyn alady. Bul týraly Qazaqstan halqy Assambleıasynyń HHHІV sessııasynda Memleket basshysy Qasym-Jomart Toqaev aıtty.
— Ókinishke qaraı, dúnıejúzi senim daǵdarysymen betpe-bet kelgen shaqta ekstremıstik ıdeologııanyń oralýy, popýlızm men talas-tartystyń órshýi, halyqaralyq quqyqtyń qunsyzdanýy, negizgi halyqaralyq ınstıtýttardyń álsireýi baıqalady. Sondyqtan Qazaqstan BUU Jarǵysyn qatań ustanýdy, Uıymdy reformalaýdy dáıekti túrde usynyp keledi. Qazirgi jaǵdaıda BUU balamasy joq ǵalamdyq uıym bolyp qala beredi. Sondyqtan biz BUU-ny qoldaımyz, — dedi Memleket basshysy.
Prezıdent elimiz túrli memleketter men aımaqtardyń arasyndaǵy dostyq pen yntymaqtastyqqa, órkenıetti dıalogty damytýǵa dáneker bolý úshin kóp kúsh jumsap kele jatqanyn basa aıtty.
— 20 jyldan asa ýaqyttan beri barlyq negizgi konfessııalardyń ókilderi ár úsh jyl saıyn Qazaqstanda bas qosady. Bıyl kúzde Álemdik jáne dástúrli dinder kóshbasshylarynyń kezekti VIIІ sezin ótkizý josparlanyp otyr. Byltyr Astanada Sezdiń Іzgilik elshileri saılandy. Olar adamgershilik ıdeıalaryn ilgeriletip, álemde dıalog pen ózara túsinistik ornatýǵa yqpal etedi. Halyqaralyq qatynastardaǵy senimsizdikti eńserý úshin rýhanı dıplomatııadan bólek, QHA qyzmetimen ushtasyp jatqan halyqtyq dıplomatııanyń da mol áleýetin paıdalaný kerek. Ártúrli el men mádenıet ókilderiniń arasyndaǵy dostyq baılanys qaqtyǵystar men soǵystardyń aldyn alady. Bul — eń tıimdi tásil. Qazaqstan halqy Assambleıasy álemdegi dıalog pen mádenı áralýandyqty nyǵaıtýǵa qyzmet etedi. Búginde álem jalpyǵa ortaq órleýge baǵyttalǵan jasampaz kún tártibi men úlken jobalardyń tapshylyǵyn qatty sezinip otyr. Qazaqstan barlyq seriktesimen kópjosparly ári nátıjeli jumysqa den qoıady, — dedi Qasym-Jomart Toqaev.
Memleket basshysynyń paıymynsha, qazirgideı aýmaly-tókpeli zamanda aýyzbirshiliktiń qadiri arta túskeni sózsiz.
— Beıbitshilik pen turaqtylyq — taǵdyrdyń bizge bere salǵan syıy emes. Bul — bir el, bir halyq bolyp atqaryp jatqan qajyrly eńbektiń jemisi. Biz syndarly sátte jurt bolyp jumyla bilemiz. Buǵan byltyr Aqtaý mańynda ushaq apaty bolǵanda taǵy bir márte kózimiz jetti. Azamattarymyz zardap shekken adamdardan kómegin aıaǵan joq. Kezekke turyp, qan tapsyrdy. Ázerbaıjan Elshiligine baryp, gúl shoqtaryn qoıdy. Búkil álem halqymyzdyń uıymshyldyǵy men janashyrlyǵyna tánti boldy. Halqymyzdyń júregi — keń, peıili — aq, nıeti — taza. Meıirimdilik, qamqorlyq jáne tileýlestik — bizdiń ulttyq ereksheligimiz. Biz osy qundylyqtarymyzdy saqtap, óskeleń urpaqtyń boıyna sińirýimiz kerek, — dedi Qasym-Jomart Toqaev.
Elordadaǵy Táýelsizdik saraıynda Memleket basshysy Qasym-Jomart Toqaevtyń qatysýymen Qazaqstan halqy Assambleıasynyń kezekti HHHІV sessııasy ótip jatyr.
Sessııa barysynda Prezıdent Qazaqstan etnostary teatrlarynyń festıvalin ótkizýdi usyndy.
Buǵan deıin eldegi 500-den astam kóshege buǵan deıin eleýsiz qalǵan jergilikti qaharmandardyń esimi beriletini anyqtaldy.