Artta qalýǵa quqyǵymyz joq – Toqaev «Tsıfrlyq Qazaqstan» baǵdarlamasy jaıly

NUR-SULTAN. QazAqparat – Memleket basshysy Qasym-Jomart Toqaev «Tsıfrlyq Qazaqstan» baǵdarlamasyn iske asyrýda Úkimet basshysyna Tsıfrlyq damý, ınnovatsııalar jáne aeroǵarysh mınıstri Asqar Jumaǵalıevke kómektesýdi júktedi, dep habarlaıdy QazAqparat tilshisi.

««Tsıfrlyq Qazaqstan» baǵdarlamasy biz kútkendeı shuǵyl ári sapaly túrde júzege asyrylyp jatqan joq. Basty másele – málimetter bazasynyń bytyrańqylyǵy. Málimetter bazasynyń ıntegratsııasy – Tsıfrlyq damý, ınnovatsııalar jáne aeroǵarysh mınıstrligi jumysynyń nómiri birinshi mindeti bolýy tıis. 2019 jylǵa josparlanǵan 196 ıntegratsııanyń 40-y oryndalmaı qalǵan», - dedi Prezıdent Úkimettiń keńeıtilgen otyrysynda.

Memleket basshysy bul turǵyda Tsıfrlyq damý, ınnovatsııalar jáne aeroǵarysh mınıstrligi basty kýratory ári úılestirýshi bolýy kerektigin eske saldy.

«Men Úkimet basshysyna mınıstrge kómektesýdi júkteımin. Bul – erekshe sıpattaǵy mańyzǵa ıe jumys. Artta qalýǵa quqyǵymyz joq», - dedi Memleket basshysy.

«Aýyldar áli kúnge deıin sapaly ınternetpen qamtamasyz etilmeı otyr. Jýyqta teledıdardan bir sıýjet kórsetti. Arqalyqtaǵy mekteptiń muǵalimderi ınternettegi kemshilikke baılanysty «Kúndelik» portalyn toltyrýǵa qınalyp júr eken. Bilýimshe, mundaı jaǵdaı basqa óńirlerde de bolǵan. Biz óz áriptesterimizden qalyp, elimizdi tsıfrlyq teńsizdikte qaldyra almaımyz», - dedi Prezıdent.